نیویارک ،25 ستمبر (اے پی پی ):پاکستان کے وزیر دفاع، خواجہ محمد آصف نے اقوام متحدہ کے پیس بلڈنگ کمیشن(پی بی سی ) کے وزارتی اجلاس میں اظہار خیال کرتے ہوئے سماجی ہم آہنگی اور جامع حکمرانی کو پائیدار امن کی کلید قرار دیا۔
اپنے خطاب میں وزیر دفاع نے کہا کہ پاکستان اقوام متحدہ کی امن مشنز میں ایک طویل عرصے سے فعال کردار ادا کر رہا ہے اور امن قائم کرنا اہم ہے، مگر امن کی تعمیر ہی اس کا اصل تسلسل یقینی بناتی ہے۔ انہوں نے کہا کہ مفاہمت، ادارہ جاتی تعمیر، اور سماجی و اقتصادی بحالی سے ہی تنازعات کا سدباب ممکن ہے۔
خواجہ محمد آصف نے امن کی تعمیر کے لیے قومی ملکیت، جامع حکمرانی، ہم آہنگی اور متوقع مالی معاونت کو چار اہم ستون قرار دیا۔ انہوں نے بین الاقوامی برادری پر زور دیا کہ وہ پاکستان کے تجربات سے سبق سیکھتے ہوئے مقامی ترجیحات کا احترام کرے اور مالی امداد کو یقینی بنائے تاکہ چھوٹے منصوبے وسیع پیمانے پر ترقی کی شکل اختیار کریں۔
انہوں نے اقوام متحدہ کے امن کی تعمیر کمیشن کی تعریف کی اور اسے اقوام متحدہ کے امن و ترقی کے شعبوں کے درمیان ایک مؤثر رابطہ کار قرار دیا، جو قومی حکام، سول سوسائٹی، بین الاقوامی مالیاتی اداروں اور علاقائی تنظیموں کو یکجا کرتا ہے۔
وزیر دفاع محمد آصف نے کہا کہ آج کے عالمی حالات میں شہریوں اور اداروں کے درمیان اعتماد مضبوط کرنا بہت ضروری ہے اور پاکستان عالمی شراکت داروں کے ساتھ مل کر ایک جامع، وسائل سے لیس، اور زمینی حقائق پر مبنی امن کی تعمیر کے نظام کو فروغ دینے کا پرعزم ہے۔
