دوحہ،05نومبر (اے پی پی):صدر مملکت آصف علی زرداری نے دوحہ میں قطر کے امیر شیخ تمیم بن حمد الثانی سے بدھ کو ملاقات کی۔ امیر قطر نے صدر مملکت کا خیر مقدم کرتے ہوئے ان کی دوحہ آمد پر شکریہ ادا کیا۔ انہوں نے کہا کہ قطر کو پاکستان اور اس کی کامیابیوں پر فخر ہے۔ امیرِ قطر نے پاکستانی کمیونٹی کے کردار کی تعریف کی اور ان کی تعداد میں خاطر خواہ اضافہ کرنے کی خواہش کا اظہار کیا۔ صدر مملکت نے امیرِ قطر کو حکومت پاکستان اور عوام کی جانب سے نیک تمناؤں کا پیغام پہنچاتے ہوئے قطر کی شاندار ترقی اور امیر کی دور اندیش قیادت کو سراہا۔ دونوں رہنماؤں نے پاکستان اور قطر کے درمیان تاریخی اور برادرانہ تعلقات کا اعادہ کیا جن کی جڑیں ایمان، باہمی اعتماد اور امن، خوشحالی اور امت مسلمہ کی ترقی کے لیے مشترکہ خواہشات پر مبنی ہیں۔ صدر مملکت نے مکالمے اور انسانی سفارت کاری کے ایک مرکز کے طور پر قطر کے بڑھتے ہوئے عالمی کردار کی تعریف کی اور غزہ کے لوگوں کے لیے جنگ بندی اور انسانی امداد کی وکالت کرنے میں امیر قطر کی قیادت کو خراج تحسین پیش کیا۔ صدر آصف علی زرداری نے پاکستان کی غیر متزلزل یکجہتی کا اعادہ کرتے ہوئے قطر کے خلاف اسرائیل کی جارحیت کی پاکستان کی جانب سے شدید مذمت اور عالمی فورمز پر قطر کی خودمختاری کے لیے اس کی مسلسل سفارتی حمایت کا ذکر کیا۔ امیر قطر نے پاکستان اور سعودی عرب کے حالیہ دفاعی معاہدے پر اطمینان کا اظہار کرتے ہوئے کہا کہ یہ ایک خوش آئند اور بروقت اقدام ہے جو پہلے ہونا چاہیے تھا۔ انہوں نے کہا کہ پاکستان چین، مغربی اور خلیجی ریاستوں کے ساتھ بیک وقت سٹریٹجک تعلقات برقرار رکھنے والے ملک کے طور پر ایک منفرد مقام رکھتا ہے۔ دونوں رہنماؤں نے سیاسی، اقتصادی اور ثقافتی شعبوں میں تعاون کو مزید مضبوط بنانے کے طریقوں پر تبادلہ خیال کیا۔ صدر مملکت نے دفاعی اور دفاعی پیداوار میں تعاون بڑھانے کی پیشکش کی جس کا امیر قطر نے مثبت جواب دیتے ہوئے کہا کہ وہ متعلقہ حکام کو پاکستان کے ساتھ فوری طور پر بات چیت شروع کرنے کی ہدایت کریں گے۔ صدر مملکت نے زراعت اور غذائی تحفظ میں تعاون بڑھانے کی تجویز بھی دی۔صدر مملکت نے پاکستان میں بڑھتی ہوئی قطری سرمایہ کاری کا خیرمقدم کرتے ہوئے اس اعتماد کا اظہار کیا کہ امیر قطر کی قیادت میں دوطرفہ تعاون بڑھتا رہے گا۔ انہوں نے قطر فنڈ فار ڈویلپمنٹ، ایجوکیشن ابوو آل فاؤنڈیشن اور دیگر قطری انسانی ہمدردی کے اقدامات کی بھی تعریف کرتے ہوئے تعلیم اور ثقافتی تبادلے کو آگے بڑھانے پر شیخہ موزہ بنت ناصر اور شیخہ المیاسہ بنت حمد الثانی کو خصوصی طور پر خراج تحسین پیش کیا۔ صدر آصف علی زرداری نے افغانستان پر اقوام متحدہ کی زیر قیادت دوحہ عمل کے اجلاسوں کی میزبانی اور سہولت میں قطر کے کردار کو سراہا جس میں مئی 2023 اور فروری 2024 میں ہونے والے پہلے اور دوسرے دور کے اجلاس بھی شامل ہیں جس نے انسانی ہمدردی، ترقی اور سلامتی کے امور پر بین الاقوامی رابطہ کاری کی حمایت کی ہے۔ امیر قطر نے اس امید کا بھی اظہار کیا کہ پاکستان اور افغانستان اپنے موجودہ مسائل حل کر لیں گے اور حالیہ چیلنجز سے آگے بڑھیں گے۔ صدر مملکت نے امیر قطر کو پاکستان کے دورے کی دعوت دیتے ہوئے علاقائی امن، ترقی اور مشترکہ خوشحالی کے لیے قطر کے ساتھ اپنی شراکت داری کو مزید مستحکم کرنے کے پاکستان کے عزم کا اعادہ کیا۔ امیر قطر نے دعوت قبول کرتے ہوئے صدر مملکت کو بتایا کہ وہ اگلے سال کے شروع میں پاکستان کا دورہ کریں گے۔ ملاقات میں پاکستان پیپلز پارٹی کے چیئرمین بلاول بھٹو زرداری اور قطر میں پاکستان کے سفیر بھی موجود تھے۔
