اسلام آباد، 27 نومبر(اے پی پی): وفاقی وزیر تخفیف غربت و سماجی تحفظ سید عمران احمد شاہ نے قومی غربت سے نجات پروگرام (این پی جی پی) کو ایک تاریخی کامیابی قرار دیتے ہوئے کہا ہے کہ اس پروگرام نے پاکستان کے غریب ترین اضلاع میں 3 لاکھ 70 ہزار گھرانوں کو انتہائی غربت سے باہر نکالا ہے۔
جمعرات کو یہاں اعلیٰ سطحی سیمینار کی صدارت کرتے ہوئے وفاقی وزیر سید عمران احمد شاہ نے این پی جی پی کے مثبت اثرات کو اجاگر کرتے ہوئے کہا کہ این پی جی پی نے ثابت کر دکھایا ہے کہ ٹھوس منصوبہ بندی اور مستقل مزاجی سے غربت کا خاتمہ ممکن ہے۔ ہم اس کامیاب ماڈل کو اسلامی ترقیاتی بینک کے اشتراک سے ملک کے تمام غریب علاقوں تک پھیلائیں گے۔ آنے والے دنوں میں ہم انتہائی غریب اور سیلاب متاثرہ خاندانوں کے لیے خصوصی پروگرام کا آغاز کریں گے۔
انہوں نے کہا کہ پروگرام کے آٹھ سالہ دور میں حاصل ہونے والے نمایاں نتائج میں 80 فیصد گھرانے انتہائی غربت سے نکل آئے ہیں، 1 لاکھ 79 ہزار نئے روزگار کے مواقع پیدا ہوئے ہیں، اور خواتین کی معاشی خودمختاری میں 48 فیصد اضافہ دیکھنے میں آیا ہے۔ 132.6 ملین ڈالر کے اس منصوبے کے تحت 1 لاکھ 65 ہزار گھرانوں کو پیداواری اثاثے اور تربیت فراہم کی گئی، 3 لاکھ 4 ہزار بلاسود قرضے تقسیم کیے گئے، اور 2 لاکھ 26 ہزار افراد کو روزگار سے متعلق ہنر کی تربیت دی گئی۔
تقریب سے خطاب میں بین الاقوامی فنڈ برائے زرعی ترقی (آئی ایف اے ڈی) کی کنٹری ڈائریکٹر مس فرنینڈا تھامس دا روشا نے کہا کہ یہ پروگرام پاکستان میں غربت کے خلاف جنگ کا ایک سنگ میل ہے، جو سماجی تحفظ کو معاشی ترقی سے مربوط کرتا ہے۔ انہوں نے کہا کہ گزشتہ چالیس سالوں سے آئی ایف اے ڈی حکومت پاکستان کا قابل اعتماد ترقیاتی شراکت دار رہا ہے۔
وزارت کے سیکرٹری نوید احمد شیخ نے کہا کہ کمیونٹی پر مبنی نقطہ نظر یہ ثابت کرتا ہے کہ وسائل کی کمی نہیں بلکہ مواقع کی کمی غربت کی بنیادی وجہ ہے۔انہوں نے کہا کہ این پی جی پی کی کامیابی کا راز خواتین کو معاشی دھارے میں لانا، ہنر اور مالیات تک رسائی کو یقینی بنانا، اور روزگار کے مواقع سے روابط قائم کرنا ہے۔
