سیالکوٹ، 14 اپریل (اے پی پی ) انچارج حج آپریشنز مجیب اکبر شاہ نے کہا ہے کہ وزارتِ مذہبی امور کے وزیر اور سیکرٹری کی ہدایات کے مطابق حاجیوں کے لیے ون ونڈو آپریشن کی سہولت مکمل کر دی گئی ہے۔
یہ بات انہوں نے اے پی پی سے گفتگو کرتے ہوئے کہی۔ انہوں نے کہا کہ پاکستان کے دیگر شہروں کی طرح سیالکوٹ کے حاجیوں کے لیے بھی بہترین انتظامات کیے گئے ہیں ۔انہوں نے بتایا کہ حاجیوں کے لیے مکہ مکرمہ میں حرم شریف کے قریب اور مدینہ منورہ میں بہترین رہائش کا انتظام ہوگا۔ ائیرپورٹ پر پہنچنے پر مخصوص عملہ حاجیوں کی رہنمائی کرے گا۔
انہوں نے کہا کہ لاہور، کراچی اور اسلام آباد جیسے شہروں کے حاجیوں کے لیے امیگریشن کا عمل روانگی سے پہلے مکمل کیا جائے گا تاکہ سفر آسان ہو سکے۔انہوں نے مزید کہا کہ ٹرانسپورٹ کی سہولت 24 گھنٹے دستیاب ہوگی، خاص طور پر ان حاجیوں کے لیے جو مقدس مقامات سے دور قیام کریں گے۔
انہوں نے بتایا کہ حاجیوں کو سم کارڈ فراہم کیے جائیں گے جن میں مختصر مدت کے لیے 25 جی بی اور طویل مدت 40 دن کے لیے 40 جی بی ڈیٹا ہوگا تاکہ وہ اپنے اہلِ خانہ سے رابطے میں رہ سکیں۔انہوں نے کہا کہ سیالکوٹ سے حج پروازوں کا آغاز 18 اپریل 2026 سے ہوگا اور ائیرسیال کی پرواز پی ایف 7702 رات 10:15 بجے مدینہ کے لیے روانہ ہوگی، جس میں 157 حاجی سوار ہوں گے۔
انہوں نے مزید بتایا کہ مجموعی طور پر 26 پروازیں جن میں 21 ائیرسیال اور 5 پی آئی اے کی ہیں، تقریبا 5200 حاجیوں کو سیالکوٹ سے سعودی عرب پہنچائیں گی۔مجیب اکبر شاہ نے کہا کہ افتتاحی دن وفاقی وزیر دفاع خواجہ محمد آصف، ڈائریکٹر حج آپریشنز محمد رضوان شریف اور سیالکوٹ انٹرنیشنل ئیرپورٹکے حکام حاجیوں کو رخصت کریں گے اور حج آپریشن 21 مئی تک جاری رہے گا۔
