لاہور، 15 مئی (اے پی پی):ڈپٹی کمشنر لاہور کیپٹن (ر) محمد علی اعجاز نے کاہنہ نو ٹی ایچ کیو ہسپتال کا دورہ کیا جہاں انہوں نے وزیراعلیٰ اسپیشل اسکریننگ کیمپ کا افتتاح کیا۔
اس موقع پر انہیں اسکریننگ کیمپ میں فراہم کی جانے والی طبی سہولیات کے حوالے سے تفصیلی بریفنگ دی گئی۔ ڈی سی لاہور نے ہسپتال کے مختلف وارڈز اور سیکشنز کا معائنہ کرتے ہوئے انتظامات کا جائزہ لیا اور مریضوں کیلئے فراہم کردہ سہولیات پر اطمینان کا اظہار کیا۔
بریفنگ میں بتایا گیا کہ اسکریننگ کیمپ میں شہریوں کے تمام ضروری لیبارٹری ٹیسٹ مفت کیے جا رہے ہیں جبکہ بیماریوں کی بروقت تشخیص کیلئے جدید سہولیات فراہم کی گئی ہیں۔ کپتان (ر) محمد علی اعجاز نے ہدایت کی کہ ہسپتال کے ہر شعبے میں صفائی کے اعلیٰ معیار کو یقینی بنایا جائے اور اسکریننگ کیمپ میں آنے والے شہریوں کی مکمل رہنمائی کی جائے۔
انہوں نے تمام تشخیصی مشینوں کو ہر وقت فعال رکھنے اور ڈاکٹرز و پیرا میڈیکل اسٹاف کو ڈیوٹی روسٹر پر سختی سے عملدرآمد یقینی بنانے کی بھی ہدایت کی۔ ڈپٹی کمشنر لاہور نے کہا کہ شہریوں کو بہترین علاج معالجہ فراہم کرنا انتظامیہ کی اولین ترجیح ہے۔ انہوں نے کہا کہ ٹی ایچ کیو ہسپتالوں میں جدید سہولیات کی فراہمی سے عوام کا سرکاری ہسپتالوں پر اعتماد مزید بڑھے گا جبکہ اسکریننگ کیمپ بیماریوں کی قبل از وقت تشخیص میں اہم کردار ادا کر رہے ہیں۔ انہوں نے اس عزم کا اظہار کیا کہ سرکاری ہسپتالوں میں آنے والے ہر فرد کو بہترین طبی سہولیات فراہم کی جائیں گی۔
