اسلام آباد،14جون (اے پی پی ):رکن قومی اسمبلی میاں خان بگٹی نے بین الاقوامی سطح پر پاکستان کے مثبت، ذمہ دارانہ اور متوازن کردار کو سراہا اور کہا کہ ان کاوشوں کے نتیجے میں دنیا بھر میں پاکستان کا مثبت امیج اجاگر ہوا۔ ان کے مطابق عالمی برادری اس بات کی معترف ہوئی ہے کہ پاکستان امن کا خواہاں ملک ہے اور خطے میں استحکام کے لیے ہمیشہ تعمیری اور مثبت کردار ادا کرتا ہے۔
قومی اسمبلی کے بجٹ اجلاس 2026-27 کے موقع پر اظہار خیال کرتے ہوئے میاں خان بگٹی نے بلوچستان کے عوام کو درپیش بنیادی مسائل کی تفصیل سے نشاندہی کی۔ انہوں نے کہا کہ صوبے کے مختلف علاقوں میں گیس اور پانی کی فراہمی میں شدید مشکلات کا سامنا ہے جو عوام کا بنیادی حق ہے، اس لیے ان سہولیات کی فراہمی پر فوری اور خصوصی توجہ دی جانی چاہیے۔
انہوں نے مزید کہا کہ بلوچستان میں مواصلاتی نظام کی بہتری بھی انتہائی ضروری ہے، خصوصاً سڑکوں اور دیگر رابطہ ذرائع کی ترقی سے نہ صرف عوامی مشکلات میں کمی آئے گی بلکہ علاقے میں معاشی اور سماجی ترقی کو بھی فروغ ملے گا۔
رکن اسمبلی نے مختلف علاقوں میں گیس کی عدم دستیابی اور فراہمی کے مسائل کی نشاندہی کرتے ہوئے ان کے مستقل حل کے لیے مؤثر اقدامات کی سفارش کی۔
انہوں نے کہا کہ بلوچستان وسائل اور صلاحیتوں سے مالا مال خطہ ہے، تاہم اس کی مکمل ترقی کے لیے موجود وسائل سے بہتر استفادہ کرنے کی ضرورت ہے اور اس مقصد کے لیے حکومتی سطح پر جامع حکمت عملی وقت کی اہم ضرورت ہے۔
میاں خان بگٹی نے بلوچستان کے نوجوانوں کے لیے روزگار کے مواقع بڑھانے پر بھی زور دیا۔ انہوں نے کہا کہ صوبے میں کام کرنے والی کمپنیوں کو مقامی نوجوانوں کو ترجیح دینی چاہیے تاکہ انہیں بہتر روزگار میسر آئے اور بے روزگاری میں کمی واقع ہو۔ انہوں نے وزیراعظم سے بھی اپیل کی کہ اس حوالے سے خصوصی توجہ دی جائے۔
آخر میں انہوں نے کہا کہ بلوچستان کی ترقی، بنیادی سہولیات کی فراہمی، گیس اور پانی کے مسائل کے حل، مواصلاتی نظام کی بہتری اور نوجوانوں کے لیے روزگار کے مواقع پیدا کرنے کے لیے فوری اور مؤثر اقدامات ناگزیر ہیں۔
