اسلام آباد، 26 اکتوبر (اے پی پی): کیپیٹل ڈیولپمنٹ اتھارٹی (سی ڈی اے) کے چیئرمین سہیل اشرف نے سیکٹر E-12 کا تفصیلی دورہ کیا، جہاں انہوں نے 40 سال بعد واگزار کرائی گئی اربوں روپے مالیت کی 1,135 کنال سرکاری اراضی پر جاری ترقیاتی سرگرمیوں کا جائزہ لیا۔
اس موقع پر انہوں نے متعلقہ حکام کو ہدایت کی کہ تمام ترقیاتی کاموں کو مقررہ مدت کے اندر اعلیٰ معیار کے ساتھ مکمل کیا جائے۔متعلقہ افسران نے چیئرمین سی ڈی اے کو منصوبے پر اب تک ہونے والی پیش رفت اور جاری کاموں کے حوالے سے تفصیلی بریفنگ دی۔
چیئرمین سی ڈی اے سہیل اشرف نے افسران کو کام کی رفتار مزید تیز کرنے کی ہدایت دیتے ہوئے کہا کہ وفاقی وزیر داخلہ سید محسن رضا نقوی کی ہدایات کے مطابق اسلام آباد کے التوا کا شکار سیکٹرز کی ترقی سی ڈی اے کی اولین ترجیحات میں شامل ہے۔ انہوں نے زور دیا کہ ترقیاتی کاموں کے معیار اور منظور شدہ ضوابط پر کوئی سمجھوتہ نہ کیا جائے۔
سیکٹر E-12 میں 1,135 کنال اراضی کی 40 سال بعد واگزاری کو سی ڈی اے کی ایک بڑی اور تاریخی کامیابی قرار دیا جا رہا ہے۔ اس اراضی کے واگزار ہونے سے نہ صرف سرکاری املاک کا تحفظ ممکن ہوا ہے بلکہ سیکٹر کی مکمل ماسٹر پلان کے مطابق کیپٹلائزیشن، بنیادی ڈھانچے کی تعمیر اور آلائٹیز کو سہولیات کی فراہمی کا راستہ بھی ہموار ہو گیا ہے۔
شہریوں اور عوامی حلقوں نے سیکٹر E-12 میں دہائیوں پرانے قبضے ختم کرانے اور ترقیاتی کاموں کا آغاز کرنے پر سی ڈی اے انتظامیہ کی کاوشوں کو بھرپور سراہا ہے۔ انہوں نے اس پیش رفت کو وفاقی دارالحکومت میں منصوبہ بندی کے تحت شہری ترقی اور رہائشی مسائل کے حل کی جانب ایک اہم سنگ میل قرار دیا۔
عوامی حلقوں نے اسلام آباد بھر میں سڑکوں کی بہتری، پارکس کی بحالی، شجرکاری اور تزئین و آرائش کے لیے سی ڈی اے کے اقدامات کا بھی خیرمقدم کیا۔ چیئرمین سی ڈی اے نے تمام شعبوں کو باہمی ہم آہنگی بڑھانے اور حائل تمام انتظامی و فنی رکاوٹوں کو فوری دور کرنے کی سخت ہدایت کی تاکہ شہریوں کو جلد از جلد ان کی اراضی کا قبضہ اور سہولیات میسر آ سکیں۔
دورے کے دوران ممبر پلاننگ، ڈائریکٹر جنرل (ورکس)، چیف ایگزیکٹو آفیسر ایم سی آئی، ڈپٹی ڈائریکٹر جنرل (انفورسمنٹ)، ایڈیشنل ڈپٹی کمشنر (جنرل)، پراجیکٹ ڈائریکٹر اور متعلقہ اسسٹنٹ کمشنر بھی چیئرمین کے ہمراہ موجود تھے۔
