اسلام آباد ، 21 جنوری (اے پی پی): پاک بحریہ کے سربراہ ایڈمرل ظفر محمود عباسی نے آج بحرین کا سرکاری دورہ کیا،مناما میں رائل بحرین نیول فورس ہیڈ کوارٹرز آمد پررائل بحرین نیول فورسز کے سربراہ نے سربراہ پاک بحریہ کا استقبال کیا۔سربراہ پاک بحریہ کو اس موقع پر روایتی انداز میں سلامی پیش کی گئی۔ پاک بحریہ کے سربراہ نے کمانڈر بحرین نیشنل گارڈز اور کمانڈربحرین کوسٹ گارڈ سے ملاقاتیں کیں۔ نیول چیف کی کمانڈر رائل بحرین نیول فورسز سے ملاقات میں پیشہ ورانہ امور اور باہمی بحری اشتراک پر تبادلہ خیال کیا گیا۔
سربراہ پاک بحریہ نے دہشت گردی کے خلاف جنگ میں پاکستان کے عزم اور کارگردگی بشمول پاک بحریہ کے ریجنل میری ٹائم سیکیورٹی پیٹرول کے اقدام پر روشنی ڈالی۔ انہوں نے فروری 2019 میں پاکستان کی جانب سے کراچی میں منعقد کی جانے والی کثیرالملکی بحری مشق امن 19 کے متعلق کمانڈر رائل بحرین نیول فورس کو بھی بریف کیا۔ کمانڈر رائل بحرین نیول فورس نے خطے میں بحری امن و استحکام کے سلسلے میں پاک بحریہ کے کردار اور خدمات کو سراہا اور باہمی دلچسپی کے امور بشمول دفاعی اور سیکیورٹی اشتراک پر تبادلہ خیال کیا گیا۔
ترجمان پاک بحریہ کے مطابق سربراہ پاک بحریہ کا یہ دورہ دونوں ممالک کی بحری افواج کے مابین تعلقات میں مضبوطی اور استحکام کا باعث ہوگا۔
اے پی پی/حمزہ رحمٰن /قراۃالعین
وی این ایس ،اسلام آباد
