اسلام آباد،08فروری(اے پی پی):وزیر اعظم عمران خان نے صوبائی حکومتوں کی مشاورت سے اقبالیات اور اسلامی تاریخ کو نصاب میں شامل کرنے کی ہدایت کی ہے تاکہ نئی نسل کو اسلام کی تاریخ ، مسلمانوں کا عروج اور برصغیر پاک و ہند میں مسلمانوں کے سب سے بڑے مفکر علامہ اقبال کی سوچ سے روشناس کرایا جا سکے۔
نئی نسل کو اسلامی تاریخ اور خصوصاً قومی شاعر علامہ محمد اقبال کے فلسفے اور سوچ سے روشناس کرانے کے لئے کیے جانے والے اقدامات کے حوالے سے منعقدہ اجلاس کی صدارت کرتے ہوئے وزیر اعظم عمران خان نے کہا کہ علامہ اقبال کا فلسفہ انسان کی سوچ کو آزاد اور تخیل کو بلندی فراہم کرتا ہے، ریاست مدینہ کے اصول آج بھی اسی طرح مسلم ہیں جسطرح اسلام کے ابتدائی دور میں انکی اہمیت مسلم تھی اور جن پر عمل پیرا ہو کر مسلمانوں نے انتہائی قلیل عرصے میں دنیا کی امامت سنبھالی، ریاستِ مدینہ کے بنیادی اصولوں کی پیروی کرتے ہوئے آج بھی ہم اپنا مقام حاصل کرسکتے ہیں۔
وزیر اعظم نے کہا کہ عوام الناس کی تاریخ اور حقائق سے نا آشنائی مفاد پرست عناصر کو موقع فراہم کرتی ہے کہ وہ تاریخ اور حقائق کو مسخ کرتے ہوئے اپنے مفادات کے لئے استعمال کریں،جس طرح بعض عناصر قبائلی علاقوں کے عوام کو گذشتہ کئی سالوں سے دہشت گردی کے خلاف جاری جنگ کی وجہ سے پیش آنے والے مسائل کو اپنے مقاصد کے لئے استعمال کر رہے ہیں اسی طرح بعض سیاست دانوں نے اسلام کو اپنی سیاسی دکان چمکانے کے لئے استعمال کیا ہے۔
اجلاس میں وزیرتعلیم شفقت محمود، وزیرِ اطلاعات چوہدری فواد حسین، ترجمان ندیم افضل چن، معاونین خصوصی افتخار درانی، یوسف بیگ مرزا، وزیر تعلیم پنجاب مراد راس خان، ماہر تعلیم و اقبالیات رضا ہمدانی اور ڈاکٹر رضا گردیزی شریک تھے۔
اے پی پی /ظہیر/حامد
سورس:وی این ایس ،اسلام آباد
