لاہور،یکم اپریل (اے پی پی ): صوبائی حکومت کا احسن اقدام ،پنجاب حکومت نے ریکارڈ مدت میں 1000 بستروں پر مشتمل فیلڈ ہسپتال تیار کر لیا۔وزیر اعلی پنجاب سردار عثمان بزدار کی ایکسپوسنٹر لاہور آمد ، 1000 بستروں پر مشتمل ریکارڈ مدت میں بنائے گئے خصوصی فیلڈ ہسپتال کادورہ سمیت کورونا کے متاثرہ مریضوں کے علاج معالجے کی سہولتوں کا جائزہ لیا ۔فیلڈ ہسپتال کے مختلف سیکشنز کا معائنہ سمیت تشخیصی کاؤنٹر، ریسکیو، کمانڈ اینڈ کنٹرول روم، ایمبولینس اور دیگر سہولیات کا بھی مشاہدہ کیا ۔
اس موقع پر وزیر اعلی پنجاب سردار عثمان بزدار نے کہا کہ محکمہ صحت،ضلعی انتظامیہ اور ریسکیو1122 کی مشترکہ کاوشوں سے 1000 بستروں پر مشتمل فیلڈ ہسپتال بنایا گیا ہے ،9 روز قبل ایکسپو سنٹر کا دورہ کیا، 9 روز میں 1000 بستروں پر مشتمل فیلڈ ہسپتال کو فنکشنل کرنا انتہائی احسن اقدام ہے ۔
وزیر اعلی پنجاب نے کہا کہ فیلڈ ہسپتال میں تین وقت کے کھانے کا انتظام بھی ہے۔اس فیلڈ ہسپتال میں مریضوں کو آئسولیشن میں رکھا جائے گا۔انہوں نے کہا کہ دیگر ہسپتالوں پر بھی پوری توجہ دے رہے ہیں ، کورونا وائرس کی تشخیص کے لئے پنجاب میں نئی 8 لیب بنائیں گے ،تشخیصی لیبز کے لئے 62 کروڑ روپے کے فنڈ ز جاری کر دیئے ہیں ،8تشخیصی لیبز کے قیام سے کورونا وائرس کی ٹیسٹنگ کی سہولت میں اضافہ ہو گا جبکہ کورونا وائرس کے کیسز سامنے آنے پر رائے ونڈکو قرنطینہ کیا گیا ہے –
وزیر اعلی نے کہا کہ دیہاڑی دار مزدوروں کو ریلیف دینے کے لئے چیف منسٹر انصاف امداد پروگرام کا آج سے آغاز کر دیا گیا ہے، زکوۃکے مستحق ایک لاکھ 70 ہزار خاندانوں کی امداد کے لئے87 کروڑ روپے کے فنڈز جاری کر دیئے ہیں۔ وزیر اعلی انصاف امداد پروگرام کے تحت ان افراد کو کل تک مالی امداد پہنچ جائے گی -انہوں نے کہا کہ پنجاب کی تاریخ میں پہلی بار مالی امداد فراہم کرنے کا انتہائی شفاف اور تیز ترین طریقہ کار اختیار کیا گیا ہے۔چیف منسٹر انصاف امداد پروگرام کے لئے 10 ارب روپے مختص کئے گئے ہیں، 25 لاکھ مستحق خاندانوں کو 4 ہزار روپے کی مالی امداد دی جائے گی۔ وزیر اعلی پنجاب انصاف امداد پروگرام کا تمام نظام آن لائن ہے جس میں آج سے درخواست دینے والوں کے کوائف کی تصدیق کی جائے گی اور لاکھوں لوگوں کو تصدیق کے بعد یہ امداد فوری طور پر دی جائے گی ،درخواست گزاروں کو کسی دفتر میں نہیں آنا پڑے گا -انہوں نے کہا کہ آن لائن صرف نام، شناختی کارڈ نمبر اور موبائل فون نمبر کی معلومات لی جائیں گی، مالی امداد کی ادائیگی بھی آن لائن ہی ہو گی اوردرخواست گزار شکایات بھی آن لائن درج کرا سکیں گے ۔
سردار عثمان بزدار نے کہا کہ ضلع کی سطح پر ڈاکٹروں، نرسوں اور پیرا میڈیکل سٹاف کو ٹریننگ دے رہے ہیں۔ پنجاب میں کورونا وائر س سے متاثرہ مریضوں کی زیادہ تعداد زائرین اور ٹریول ہسٹری رکھنے والوں کی ہے 33 لوکل ٹرانسمیشن کے مریض ہیں، 36 اضلاع میں صوبائی وزراء کی ڈیوٹیاں لگائی گئی ہیں۔ صوبائی وزراء اپنے اضلاع میں کوروناوائرس سے نمٹنے کے اقدامات کی نگرانی کر رہے ہیں -انہوں نے کہا کہ صوبائی وزراء چیف منسٹر انصاف امداد پروگرام کے تحت مستحق افراد کو مالی امداد کی تقسیم کے عمل سمیت اپنے تفویض کردہ اضلاع میں گندم خریداری مہم کی بھی نگرانی کریں گے۔
عثمان بزدار نے کہ کہا کسانوں سے گندم 1400 روپے فی من کے حساب سے خریدی جائے گی، گندم خریداری کیلئے گردآوری کی شرط ختم کر دی ہے -انہوں نے کہا کہ کسانوں سے گندم پہلے آئیے، پہلے پائیے کی بنیاد پر خریدیں گے۔گندم خریداری مراکز کے لئے ایس او پیز جاری کر دیئے گئے ہیں، گندم خریداری مراکز پر ایس او پیز پر مکمل عملدرآمد کرائیں گے –
اس موقع پر کمشنر لاہورڈویژن نے فیلڈ ہسپتال کے قیام کے حوالے سے بریفنگ دیتے ہوئے بتایا کہ فیلڈ ہسپتال میں مریضوں کی سکریننگ کی سہولت بھی رکھی گئی ہے، تشخیصی کاؤنٹر بھی بنایا گیا ہے جبکہ فیلڈہسپتال میں کوروناریسکیو، کمانڈاینڈ کنٹرول روم بھی قائم کیا گیا ہے –
اس موقع پر صوبائی وزیر صحت ڈاکٹر یاسمین راشد،صوبائی وزیر اطلاعات فیاض الحسن چوہان،اراکین پنجاب اسمبلی مسرت جمشید چیمہ،عظمی کاردار،سعدیہ سہیل،سیکرٹری سپیشلائزڈ ہیلتھ کیئر و میڈیکل ایجوکیشن،کمشنر لاہور ڈویژن، سیکرٹری اطلاعات، ڈی جی ریسکیو1122اور متعلقہ حکام بھی موجود تھے۔
اے پی پی /لاہور /قرۃالعین
