پشاور، 30نومبر(اے پی پی): صوبائی وزیر تعلیم شہرام خان ترکئی نے کہا ہے کہ این سی او سی کی گائیڈ لائنز کے مطابق صوبے کے تمام سکولوں میں طلباء وطالبات کو ہفتے میں صرف ایک دن اور ایک کلاس کو بلایا جاتا ہے، جس میں ان کو ہوم ورک اور اسائنمنٹس دی جاتی ہیں اور ان کی رہنمائی کی جاتی ہے۔تمام سکول انتظامیہ اور طلباء ایس او پیز پر عمل کر رہے ہیں۔ اس کے علاوہ ماسک پہننا لازمی ہے جبکہ جاری ہدایات کی خلاف ورزی کرنے پر قانونی کارروائی ہوگی۔
ان خیالات کا اظہار صوبائی وزیر نے گورنمنٹ ہائر سیکنڈری سکول کینٹ نمبر ون پشاور کے دورے کے موقع پر میڈیا سے گفتگو کرتے ہوئے کیا جہاں ڈائریکٹر ایجوکیشن حافظ محمد ابراہیم اور ڈسٹرکٹ ایجوکیشن آفیسر پشاور بھی ان کے ہمراہ تھے۔
شہرام خان ترکئی نے دورے کے موقع پر مختلف کلاسز کا معائنہ کیا اور طلباء کو ایس او پیز پر عمل درآمد کرنے کی ترغیب دی۔ انہوں نے طلباء کو ہوم ورک اور اسائنمنٹس پر خصوصی توجہ دینے کی ہدایت بھی کی کہ ان کے نمبرز سالانہ امتحان میں شمار کئے جائیں گے۔
ایک سوال کے جواب میں شہرام خان ترکئی نے کہا کہ کرونا کی دوسری لہر خطرناک ہے ۔ہم نے سکولوں کو مرحلہ وار اجازت دی ہے جبکہ حکومت نے اپنے جلسے بھی کینسل کر دیے ہیں، اور ان حالات میں بھی پی ڈی ایم بضد ہیں اور عوام کے جانوں سے کھیل رہی ہیں جبکہ اپنی ذاتی تقریبات میں شرکت کے لیے بھی انہوں نے کرونا ٹیسٹ لازمی قرار دیا ہے۔
صوبائی وزیر تعلیم نے سکولوں میں سہولیات کی فراہمی کے حوالے سے کہا کہ پیرنٹس ٹیچرز کونسل کے ذریعے صوبے کے تمام سکولوں میں سہولیات فراہم کر رہے ہیں اور پلان کے مطابق آئندہ دو سالوں میں ہر طالب علم کو فرنیچر دستیاب ہوگی۔ ضم اضلاع بشمول پورے خیبر پختونخوا میں اساتذہ کی دستیابی کے لئے تقریبا پچیس ہزار آسامیاں مشتہر کی گئی ہے۔
صوبائی وزیر نے کہا کہ ہمارے طلباء ہمارا فوکس ہیں ،ان کی صحت اور تعلیم کو مدنظر رکھ کر فیصلے کر رہے ہیں جبکہ محکمہ تعلیم آن لائن کلاسز کیلئے بھی اقدامات کر رہی ہیں اور طلباء کو وٹس ایپ گروپس سوشل میڈیا محکمہ تعلیم ویب سائیٹ اور دوسرے ذرائع سے بھی تعلیم دی جا رہی ہے۔
شہرام خان ترکئی نے کہا کہ میں خود تمام سسٹم کو مانیٹر کر رہا ہوں، تمام ڈسٹرکٹ ایجوکیشن آفیسرز اور ایجوکیشن مانیٹرنگ اتھارٹی کو بھی ہدایات جاری کی گئی ہیں کہ ایس او پیز پر عمل درآمدیقینی بنانے اور طلباء کو سہولیات فراہم کریں۔
