لاہور،یکم دسمبر(اے پی پی): وزیراعلیٰ پنجاب سردار عثمان بزدار کی زیرصدارت منگل کو یہاں اجلاس منعقد ہوا،اجلاس میں پنجاب روڈ سیفٹی اتھارٹی کے قیام کی اصولی منظوری سمیت لاہور میں جدید بس ٹرمینل بنانے کا فیصلہ کیا گیا۔
وزیر اعلیٰ پنجاب نے اجلاس میں بین الاقوامی معیار کا بس ٹرمینل بنانے کی بھی اصولی منظوری دی جبکہ پنجاب ماس ٹرانزٹ اتھارٹی کی کارکردگی کو بہتر بنانے کیلئے کمیٹی تشکیل دینے کی ہدایت بھی کی ۔اجلاس میں ٹرانسپورٹ سے متعلق نئی فورس بنانے کی تجویز کا جائزہ لیا گیا۔
عثمان بزدار نے کہا کہ حکومت صوبے کے ٹرانسپورٹ نظام کو مزید بہتر بنانے کیلئے سرگرم ہے،نیا بس ٹرمینل ٹھوکر نیاز بیگ کے قریب بنایا جائے گا۔
وزیر اعلیٰ نے محکمہ ٹرانسپورٹ کی کارکردگی اور عوام کو معیاری سفری سہولتوں کی فراہمی کا جائزہ لیا۔انہوں نے کہا کہ فیصل آباد اور ملتان میں بھی نئے بس ٹرمینل بنائیں گے۔وزیراعلیٰ عثمان بزدار نے محکمہ ٹرانسپورٹ کو 10 دسمبر تک بس ٹرمینل کا ڈیزائن پیش کرنے کی ہدایت کی ہے۔
وزیر اعلی پنجاب نے کہا کہ لاہور سمیت پنجاب کے بڑے شہروں میں گرین الیکٹرک بسیں چلائی جائیں گی۔انھوں نے کہا کہ بسیں معیاری اور پائیدار ہونی چاہئیں۔ الیکٹرک بسوں کی خریداری کیلئے ضروری امور جلد نمٹائے جائیں۔خریداری کا تمام عمل انتہائی شفاف اور قواعد و ضوابط کو مدنظر رکھ کر ہونا چاہیے،الیکٹرک بسوں سے ماحولیاتی آلودگی اور سموگ میں کمی ہوگی۔انہوں نے مزید کہا کہ لاہور ٹرانسپورٹ کمپنی کا دائرہ کار پنجاب کے ہر شہر تک پھیلائیں گے۔
