اسلام آباد، 29 دسمبر(اے پی پی ): اسپیکر قومی اسمبلی اسد قیصر نے کہا ہے کہ پاکستان اور چین کے مابین منفرد نوعیت کے دوستانہ تعلقات دنیا کے لیے ایک مثال ہےجبکہ دونوں دوست ممالک میں تعلقات باہمی احترام، اعتماد، مفادات اور اسٹریٹجک شراکت داری پر استور ہیں۔
اسپیکر قومی اسمبلی اسد قیصر سے منگل کو یہاں چین کے سفیر نوگ رونگ نے ملاقات کی ۔ملاقات میں دوطرفہ تعلقات، اہم علاقائی و عالمی معاملات اور باہمی دلچسپی کے دیگر امور پرتبادلہ خیال کیا گیا۔
اسپیکر اسد قیصر نے کہا کہ دونوں دوست ممالک کے بابین تعلقات ہر گزرتے دن کے ساتھ مضبوط سے مضبوط تر ہورہے ہیں،چین اور پاکستان علاقائی و عالمی معاملات پر یکساں موقف کے حامل ہیں اور دونوں دوست ممالک نے علاقائی و عالمی فورمز پر ایک دوسرے کے موقف کی حمایت کی ہے۔
انہوں نے کہا کہ چین پاکستان اقتصادی راہداری منصوبہ دوست ملک چین کی طرف سے پاکستان کے لیے ایک تحفہ ہے، چین پاکستان اقتصادی راہداری(سی پیک) اور ون بیلٹ ون روڈ کا اقدام پورے خطے کی ترقی اور خوشحالی کے منصوبے ہیں۔ انہوں نے کہا کہ پارلیمان سی پیک کو کامیابی سے ہمکنار کرنے کے لیے اپنا کردار ادا کرتی رہے گی، پارلیمان کے زیر سرپرستی تمام صوبوں بشمول آزاد کشمیر اور گلگت بلتستان میں سیمینار منعقد کیے جار ہے ہیں ۔
اسپیکر قومی اسمبلی نے کہا کہ ان سیمیناروں میں سی پیک سے متعلقہ اسٹیک ہولڈرز کی شمولیت سے سی پیک کی افادیت میں گراں قدر اضافہ ہو گا، رشہ کئی اکنامک زون سے پاکستان میں صنعتی شعبے کو فروغ حاصل ہوگاجس سے علاقے میں ترقی و خوشحالی کے ایک نئے دور کا آغاز ہو گا، دونوں ممالک کی پارلیمان کے مابین رابطوں کے فروغ سے دوطرفہ تعلقات کو نئی بلندیوں تک پہنچایا جا سکتا ہے ۔
اسپیکر اسد قیصر نے پاکستان اور چین کی سفارتی تعلقات کے 70سال مکمل ہونے پر دونوں ممالک کی حکومتوں اور عوام کومبارکباد کا پیغام دیا اور کہا کہ چین اور پاکستان کےسفارتی تعلقات کی 7 دہائیوں مکمل ہونے کے موقع پر دونوں اسپیکرز کی ورچوئل کانفرنس کی تجویز سے اتفاق کیا ۔
چینی سفیر نوگ رونگ نے کہا ہے کہ چین پاکستان کے ساتھ اپنی مثالی دوستی کو قدر کی نگاہ سے دیکھتا ہے، چین کی خارجہ پالیسی میں پاکستان کے ساتھ دوستی کو کلیدی اہمیت حاصل ہے، چین اور پاکستان ایک دوسرے ہر دکھ سکھ کے دوست ہیں اور دونوں ممالک نے ہر مشکل وقت مین ایک دوسرے کا ساتھ دیا ہے۔
انہوں نے کہا کہ چین پاکستان تجارتی حجم اور معاشی تعاون کو مزید وسعت دینے کا خواہان ہے، اسپیکرز کی ورچوئل کانفرنس سے باہمی پارلیمانی تعلقات مزید مستحکم ہونگے۔
