ملتان،27مارچ (اے پی پی):وزیراعلیٰ پنجاب سردار عثمان بزدار کا ملتان میں کورونا ویکسینیشن سنٹر کا اچانک دورہ، این سی او سی کی ویڈیولنک میٹنگ کے فوری بعد وزیر اعلی عثمان بزدارمحلہ امیرآباد میں ڈی ایچ ڈی سی کورونا ویکسینیشن سنٹرپہنچے،
وزیر اعلی نے سنٹر پر بزرگ شہریوں کو کورونا ویکسینیشن کے عمل کا جائزہ لیا اور سنٹرپر فراہم کردہ سہولتوں کا معائنہ کیا۔
وزیراعلیٰ عثمان بزدار نے ویکسین لگوانے کے لئے آئے بزرگ شہریوں کی خیریت دریافت کی اور سینٹر میں سہولتوں کے بارے میں دریافت کیا،بزرگ خاتون نے سنٹر پر بہترین انتظامات پر وزیر اعلی عثمان بزدار کو دعائیں دیں کہا اللہ تعالی آپ کو بزرگ شہریوں کی مزید خدمت کی توفیق دے۔
دیگر بزرگ شہریوں نے سنٹر میں مہیا کی گئی سہولتوں پر اطمینان کا اظہار کیا اور کہا کہ آپ کی قیادت میں پنجاب حکومت نے ویکسین لگوانے کے لئے بہترین انتظامات کئے ہیں۔
اس موقع پر وزیر اعلیٰ عثمان بزدار نے کہا کہ پنجاب میں ہیلتھ ورکرز کے ساتھ بزرگ شہریوں کو کورونا ویکسین لگانے کا عمل خوش اسلوبی سے جاری ہے۔انہوں نے کہا کہ میں ویکسینیشن کے عمل کا ذاتی طور پر جائزہ لے رہا ہوں،ویکسینیشن کے لئے پنجاب کے ہر ضلع میں سنٹرز قائم کئے گئے ہیں۔عثمان بزدار نے کہا کہ ہیلتھ ورکرز اور بزرگ شہریوں کے بعد اب 50 سال سے زائد عمر کے لوگوں کو بھی ویکسین لگانے کا عمل جلد شروع کیا جائے گا ۔انہوں نے کہا کہ ہم سب نے اس قومی چیلنج کا مل کر مقابلہ کرنا ہے، کورونا پر قابو پانے کے لئے ہر ایک کو اپنی ذمہ داری کا احساس کرنا ہو گا-
وزیر اعلیٰ عثمان بزدار نے کہا کہ خوشی ہے کہ بزرگ شہریوں کو عزت و احترام کے ساتھ ویکسینیشن کا عمل جاری ہے۔انہوں نے کہا کہ حکومت نے عوام کی زندگیوں کی حفاظت کیلئے ضروری اقدامات کئے ہیں۔
صوبائی وزیر توانائی ڈاکٹر اختر ملک اور متعلقہ حکام بھی اس موقع پر موجود تھے۔
