سیالکوٹ،5اگست (اے پی پی):بھارتی حکومت کی جانب سے غیرقانونی زیر تسلط جموں و کشمیرخصوصی حیثیت ختم کرنے اور پوری وادی کو ملٹری جیل میں تبدیل کرنے کے2سال مکمل ہونے پر ” یوم استحصال کشمیر“کے حوالہ سے ضلع سیالکوٹ کی چاروں تحصیلوں میں احتجاجی ریلیاں نکالی گئی ۔ضلع سیالکوٹ میں کشمیر کی مظلوم عوام سے اظہار یکجہتی کیلئے صبح 9بجے ایک منٹ کیلئے خاموشی اختیار کی گئی اور پاکستان اور کشمیر کے قومی ترانےبجائے گئے ۔سیالکوٹ کی چاروں تحصیلوں میں کشمیریوں سے اظہار ہمدردی اور بھارتی مظالم کی شکار کشمیری عوام کی تصاویر سے مزئین بل بورڈ اور اسٹیمرز آویزاں کئے گئے ۔سیالکوٹ میں ڈپٹی کمشنر آفس سے ایڈیشنل ڈپٹی کمشنر ریونیو میر محمد نواز کی زیر صدارت ریلی میں اے سی سونیا صدف اور سی او ایم سی ایس فیصل شہزاد سمیت ڈی سی آفس کے عملہ نے شرکت کی ۔ ریلی ایوان صنعت وتجارت سیالکوٹ جاکر اختتام پذیر ہوئی ۔ ڈسکہ میں فوارہ چوک تا اے سی آفس، پسرور میں ایم سی آفس سے اے سی آفس اور سمبڑیال میں اے سی آفس تا سمبڑیال موڑ تک ریلی نکالی گئی۔ ریلیوں کے اختتام پر کشمیر پر بھارتی غاصبانہ تسلط کے خاتمہ اور ملک و قوم کے استحکام اور سلامتی کیلئے خصوصی دعائیں بھی کی گئیں۔
