اسلام آباد،22ستمبر (اے پی پی):وفاقی وزیر داخلہ شیخ رشید احمد نے کہا ہے کہ پاکستان میں کو ئی مہاجر کیمپ نہیں بنایا گیا، چمن اور طورخم بارڈر پر مکمل امن ہے۔
ان خیالات کا اظہار انہوں نے بدھ کو وفاقی وزیر اطلاعات چوہدری فواد حسین کے ہمراہ پریس کانفرنس سے خطاب کرتے ہوئے کیا۔ وزیر داخلہ شیخ رشید احمد نے کہا کہ افغانستان کی صورتحال میں پاکستان کا تاریخی کردار ہے، ہم نے 10 ہزار سے زائد لوگوں کو وہاں سے نکالنے میں سہولت فراہم کی، نیٹو فورسز، آئی ایم ایف اور امریکہ کے شہری بھی ان میں شامل ہیں۔ انہوں نے بتایا کہ افغانستان سے ایک مہاجر بھی پاکستان نہیں آیا، طورخم اور چمن بارڈر بہتر طریقے سے کام کر رہے ہیں، پاکستان سے افغانستان جانے والے لوگوں کی تعداد زیادہ ہے جبکہ افغانستان سے پاکستان آنے والے لوگوں کی تعداد بہت کم ہے۔
جو لوگ سمجھتے ہیں نیوزی لینڈ کی ٹیم کے واپس جانے سے پاکستان تنہا ہو جائے گاوہ عقل کے اندھے ہیں، ہم زندہ قوم ہیں، ہمیں تنہاءنہیں کیا جا سکتا، بھارت کو افغانستان کے حوالے سے سبکی کا سامنا کرنا پڑا ہے، شیخ رشید احمد
وفاقی وزیر اطلاعات چوہدری فواد حسین نے کہا کہ یہ سارا ٹوپی ڈرامہ ہے، اس ٹوپی ڈرامے کے دستانے پہنے ہوئے ہاتھوں کو ناکامی ہوگی، پاکستان ایک عظیم قوم ہے، پاکستان کی سکیورٹی اور فوج کی ایجنسیاں مضبوط ہیں، یہاں ایک منتخب حکومت موجود ہے، ہمیں کوئی تنہاءنہیں کر سکتا، ہم آگے بڑھیں گے۔ ایک سوال پر انہوں نے کہا کہ بھارت میں بہت سے لوگوں کو جیلوں سے ضمانتوں پر نکالا جاتا ہے، انہیں تربیت فراہم کی جاتی ہے اور انہیں پاکستان میں دہشت گردی کے لئے استعمال کیا جاتا ہے۔ بھارت پاکستان میں دہشت گردی سے باز نہیں آ رہا۔ انہوں نے کہا کہ ہمارا بیانیہ امن ہے اور امن اس ملک میں قائم ہے۔
