لاہور، 28 نومبر (اے پی پی): کمشنر لاہور کیپٹن ریٹائرڈمحمد عثمان کی قیادت میں جناح ہسپتال تا مین بلیوارڈ جوہر ٹاون تک انسداد سموگ سائیکل ریلی نکالی گئی ۔ انسداد سموگ سائیکل ریلی میں درجنوں بچوں،خواتین اور مردوں نے شرکت کی سائیکل ریلی کے اختتام پر انسداد سموگ آگاہی پروگرام کا انعقاد کیا گیا۔
کمشنر لاہور کیپٹن ریٹائرڈ محمد عثمان نے پروگرام سے خطاب میں کہا کہ ہم سائیکلنگ کلچر کو فروغ دے رہے ہیں جو کہ انسداد سموگ کیلئے بھی ضروری ہے۔انہوں نے کہا کہ سائیکلنگ کلچر کا فروغ شہریوں کی صحت،ماحولیات کی بہتری کیلئے ناگزیر ہے، شہر کی سڑکوں کو سائکل فرینڈلی بناناایک چیلنج ہے اور حکومت پنجاب کی رہنمائی میں اس پر کام کر رہے ہیں۔
انسداد سموگ سائیکل ریلی کے دوران سڑکوں پر نارمل ٹریفک بھی رواں دواں رہی اس سے قبل سائیکل ریلی کے شرکاء نے کمشنر لاہور کیپٹن ر محمد عثمان کی آمد پر پرتپاک استقبال کیا۔
