لاہور، 02 دسمبر (اے پی پی): وزیر اعلیٰ پنجاب سردار عثمان بزدار نے کہا کہ پنجاب میں سرمایہ کاروں کو ون ونڈو کے تحت سرمایہ کاری کی سہولت فراہم کی گئی ہے۔سرمایہ کاری کے حوالے سے زیرو این او سی کی پالیسی جلد متعارف کرائیں گے۔
ان خیالات کا اظہار وزیراعلیٰ پنجاب سردار عثمان بزدار نے پروکٹر اینڈ گیمبل پاکستان کے چیف ایگزیکٹو آفیسر عادل فرحت سے ملاقات میں کیا ۔انہوں نے کہا کہ انسپکٹر لیس رجیم کا نظام متعارف کرا چکے ہیں۔ لیبر لاز میں بھی آسانیاں پیدا کی جا رہی ہیں۔ پنجاب میں سرمایہ کاری کیلئے سپیشل اکنامک زونز بنائے جا رہے ہیں۔
عثمان بزدار نے کہا کہ پنجاب میں سرمایہ کاروں کیلئے وزیراعلیٰ سرمایہ کاری سہولت سینٹر قائم ہو چکا ہے۔سرمایہ کاری بڑھنے سے روزگار کے مواقع پیدا ہوں گے اور معیشت مستحکم ہوگی،3 برس میں 16 سیمنٹ پلانٹس کی منظوری دے چکے ہیں۔انہوں نے کہا کہ سرمایہ کاری میں آسانیاں پیدا کرنے کیلئے انقلابی اقدامات کئے ہیں۔
وزیر اعلیٰ نے کہا کہ پنجاب میں سرمایہ کاروں کو ترجیحی بنیادوں پر سہولتیں فراہم کی جا رہی ہیں۔چیف ایگزیکٹو آفیسر پروکٹر اینڈ گیمبل پاکستان نے اس موقع پر گفتگو کرتے ہوئے کہا کہ وزیراعلیٰ عثمان بزدار کی قیادت میں پنجاب حکومت نے کورونا وباء کے دوران بزنس کمیونٹی کیلئے بے پناہ آسانیاں پیدا کیں ہیں، اربوں روپے کا ٹیکس ریلیف د ے کر وزیراعلیٰ عثمان بزدار کی قیادت میں پنجاب حکومت نے بزنس فرینڈلی اقدامات کئے۔
چیف ایگزیکٹو آفیسر پروکٹر اینڈ گیمبل پاکستان نے کہا کہ پنجاب میں سرمایہ کاری کیلئے سازگار فضا موجود ہے، پنجاب میں سرمایہ کاری کے بہترین مواقع سے فائدہ اٹھائیں گے۔ وزیراعلیٰ عثمان بزدار کی جانب سے سرمایہ کاروں کی سہولت کیلئے کئے گئے اقدامات قابل ستائش ہیں۔
