ملتان 18، دسمبر (اے پی پی ): ضلعی انتظامیہ کا مسیحی برادری کیلئے کرسمس کے بھرپور انتظامات کرنے کا فیصلہ ،ڈپٹی کمشنر عامر کریم خاں کی ہدایت پر کرسمس بازار قائم کئے جائیں گے ۔ گرجا گھروں کی بھرپور سکیورٹی اور تزئین و آرائش کی جائے گی۔
اس حوالے سے ڈپٹی کمشنر عامر کریم خاں نے کرسچن کمیونٹی کے نمائندگان سے ملاقات کی،پاسٹر یوسف رضا اور پاسٹر طلب نے کرسمس کے حوالے سے تجاویز پیش کیں ۔
ڈپٹی کمشنر نے کہا حکومت پنجاب مسیحی برادری کی خوشیوں میں شامل ہے ، گرجا گھروں کی صفائی اور سیوریج بہتری کیلئے محکوموں کو ٹاسک دے دیا ۔
انہوں نے کہا کہ عبادت گاہوں کے روٹس پر سٹریٹ لائٹس اور بھرپور سجاوٹ کی جائے۔
اس موقع پر ایڈیشنل ڈپٹی کمشنر جنرل قمر الزماں قیصرانی اور اسسٹنٹ کمشنر سٹی خواجہ عمیر محمود بھی موجود تھے۔
سورس :وی این ایس ،ملتان
