لاہور،11مئی ( اے پی پی ): جنوبی پنجاب خصوصاً بہاولپور اور چولستان میں پانی کی قلت،وزیراعلیٰ پنجاب حمزہ شہبازکی زیر صدارت ہنگامی اجلاس منعقد ہوا۔وزیراعلیٰ حمزہ شہباز نے متاثرہ علاقوں میں جنگی بنیادوں پر امدادی سرگرمیاں شروع کرنے کی ہدایت کی ۔انہوں نے کہا کہ انتظامیہ اور پولیٹیکل ٹیم متاثرہ علاقوں میں امدادی سرگرمیوں کی نگرانی کریں، پانی کی قلت دور کرنے کیلئے عارضی تالاب بنائے جائیں، واٹر بوزر کے ذریعے پانی کا فوری طور پر انتظام کیا جائے۔
وزیراعلیٰ پنجاب حمزہ شہباز نے کہا کہ اپنے متاثرہ بہن بھائیوں کے ساتھ کھڑا ہوں، صورتحال کو24 گھنٹے مانیٹر کر رہے ہیں، متاثرہ علاقوں میں صورتحال اور امدادی سرگرمیوں کی باقاعدہ مانیٹرنگ کیلئے ہدایات جاری کردی ہیں ،متاثرہ بہن بھائیو ں کی ہر ممکن مدد کریں گے۔انہوں نے کہا کہ پانی کی قلت سے زیادہ متاثرہ علاقوں پر سب سے زیادہ فوکس ہے۔
حمزہ شہباز نے کہا کہ انتظامیہ اور سیاسی ٹیمیں متاثرہ علاقوں میں نقصانات کا تخمینہ لگا کر رپورٹ پیش کریں۔انہوں نے نہری پانی چوری کے واقعات کی روک تھام کیلئے کریک ڈاؤن کی ہدایت کی اور کہا کہ پانی چوری کرنے والوں کے خلاف مقدمات درج کرکے کارروائی کی جائے،پانی چوری کے واقعات میں کسی قسم کا دباؤ قبول نہ کیا جائے۔
سیکرٹری آبپاشی نے دریاؤں اور نہروں میں پانی کی آمد و اخراج کے بارے میں بریفنگ دی۔اراکین صوبائی اسمبلی سردار اویس احمد خان لغاری، یاورزمان، چیف سیکرٹری، انسپکٹرجنرل پولیس، پرنسپل سیکرٹری وزیراعلیٰ، سیکرٹری آبپاشی،سیکرٹری زراعت اور متعلقہ حکام نےاجلاس میں شرکت کی۔
