اسلام آباد،8جون (اے پی پی):قومی اقلیتی کمیشن کے چیئرمین ودیگر مذہبی شخصیات نے کہا ہے کہ نبی کریم ﷺ کی شان میں گستاخی ناقابل قبول ہے ، ہم اس کی بھرپور مذمت کرتے ہیں اور مطالبہ کرتے ہیں کہ بھارتی سرکار معافی مانگے ۔
ان خیالات کا اظہار قومی اقلیتی کمیشن کے چیئرمین ڈاکٹر چیلارام، مولانا سید محمد عبدالخبیر آزاد چیئرمین مرکزی رؤیت ہلال کمیٹی پاکستان،ڈاکٹر جے پال،البرٹ ڈیوڈ،سردار ممپال سنگھ،سارہ صفدر،مفتی گلزار احمدنعیمی،بیگم روشن آرا،سردار سروپ سنگھ و دیگر ممبران اور مذہبی رہنماؤں نے مشترکہ پریس کانفرنس میں کیا ۔انہوں نے کہا کہ بھارت میں نبی کریمﷺ کی شان میں گستاخی کرنے کی ہم شدید الفاظ میں مذمت کرتے ہیں ہم سب تمام ادیان عالم کے رہنماء بھارتی وزیر اعظم نریندر مودی کو خبردار کرتے ہیں کہ وہ تمام اقلیتوں پراپنے مظالم بندکرے،دہشت گرد مودی صرف مسلمانوں کا ہی نہیں بلکہ تمام اقلیتوں کا دشمن ہے جوکہ مسلسل جارحیت کا ارتکاب کر رہا ہے،مودی کے خطرناک عزائم کے تدارک کے لیے اقدامات نہ کئے گئے تو دنیا کا امن لپیٹ میں آجائے گا۔
بین المذاہب رہنماؤں نے کہا کہ دین اسلام ودیگرمذاہب عالم احترام انسانیت،امن و محبت کا درس دیتے ہیں، قطر، کویت، ایران، عمان،ملائشیاء و دیگر ممالک نے اس گستاخی پر شدید مذمت کر کے جذبہ ایمانی کا ثبوت دیا ہے،توہین رسالتﷺ کی جسارت ناقابل قبول ہے ،ایسے واقعات کی روک تھام کے لیے اقوام متحدہ،او آئی سی مشترکہ لائحہ عمل بنائیں،توہین رسالتﷺ میں ملوث عناصر کے خلاف عالمی عدالت میں مقدمات چلائے جائیں،ہم سب بین المذاہب رہنماء پوری دنیا کے ممالک اور عوام سے اپیل کرتے ہیں کہ وہ بھارتی مصنوعات کا مکمل بائیکاٹ کریں۔
