اسلام آباد، 21 اگست (اے پی پی ): جنوبی پنجاب، بلوچستان اور سندھ کے سیلاب زدہ علاقوں میں پاک فضائیہ کی امدادی کارروائیاں جاری ہیں۔مون سون کی حالیہ بارشوں کے دوران پاکستان ایئر فورس سیلاب سے متاثرہ علاقوں نورواہ، مدد پور، کوٹ مگسی، ماڑی پور، صحبت پور، حبیب کوٹ، فتح پور، صادق پل، فاضل پور اور حاجی پور میں پھنسے ہوئے لوگوں کو انسانی ہمدردی کی بنیاد پر امداد فراہم کرنے کا سلسلہ جاری رکھے ہوئے ہے۔
ترجمان پاک بحریہ کے مطابق سربراہ پاک فضائیہ ائیر چیف مارشل ظہیر احمد بابر سدھو کی خصوصی ہدایات پر پی اے ایف کی ایمرجنسی رسپانس ٹیمیں گھروں میں پھنسے لوگوں کو راشن فراہم کرنے کے لیے دن رات کوشاں ہیں۔ آپریشن کے دوران سینکڑوں سیلاب متاثرین کو محفوظ مقامات پر منتقل کر دیا گیا ہے۔
پاکستان ائیر فورس کے قائم کردہ فیلڈ میڈیکل کیمپوں میں سیلاب متاثرین کو علاج اور ادویات کی بروقت فراہمی کے لیے تمام دستیاب وسائل بروئے کار لائے جا رہے ہیں۔
ترجمان پاک بحریہ کے مطابق پاک فضائیہ قدرتی آفات کے دوران انسانی امداد پہنچانے میں ہمیشہ پیش پیش رہی ہے۔ جنوبی پنجاب، بلوچستان اور سندھ کے علاقوں میں ریلیف آپریشن پی اے ایف کے مشکل کی گھڑی میں ہم وطنوں کی ہر ممکن مدد کرنے کے عزم کا عملی مظہر ہے۔
