سیالکوٹ،12اگست(اے پی پی):ڈپٹی کمشنر سیالکوٹ میثم عباس نے کہا ہے کہ دریائے چناب میں ہیڈ مرالہ کے مقام پر نچلے درجے کا سیلاب ہے ۔ مرالہ بیراج پر اپ اسٹریم 1 لاکھ 22ہزار 500 کیوسک جبکہ ڈاؤن اسٹریم 1لاکھ 10ہزار 400 کیوسک ہے۔انہوں نے کہا کہ اس وقت برساتی نالہ ایک میں انتہائی اونچے درجے کا سیلاب ہے،نالہ ایک میں اورا کے مقام پر 16ہزار416کیوسک پانی کا بہاؤ ریکارڈ کیا گیا۔
انہوں نے کہا کہ ضلعی انتظامیہ سیلابی صورتحال میں ممکنہ سیلاب سے پیدا ہونے والی صورتحال سےنمٹنے کیلئے پوری طرح تیار ہے ۔فلڈ فائٹنگ ، ریسیکیو اور ریلیف ٹیمیں فلڈ پلان کے مطابق ضروری مشینری اور آلات کے ساتھ اپنی ڈیوٹی پر پہنچ چکے ہیں۔ممکنہ طور پر سیلاب کی زد میں آنے والے علاقوں کے مکینوں کو الرٹ جاری کردیا گیا ہے کہ وہ خود اور اپنا مال مویشی بروقت محفوظ مقام پر منتقل کرلیں۔انہوں نے شہریوں سے اپیل کرتے ہوئے کہا کہ وہ بچوں کوبرساتی نالوں میں نہانے سے منع کریں ۔
انہوں نے کہاکہ ضرورت پڑنے پر افراد اور مال مویشی کے انخلاء سمیت متاثرین کیلئے فوڈ ہمپرز ، ریلیف کیمپس اور جانوروں کو چارے کی فراہمی کی جائے گی ۔ضلع سیالکوٹ میں بہنے والے دریائے چناب ، دریائے توی، نالہ ڈیک اور نالہ ایک سمیت تمام برساتی نالوں میں پانی کی مانیٹر نگ کی جارہی ہے ، نالہ بھیڈ میں 190اور پلکھو 262میں پانی کا بہاؤکیوسک ہےاور پانی کی سطح کم ہورہی ہے ۔ انہوں نے کہاکہ ممکنہ طور پر زیر آب آنے والے علاقوں کے مکینوں کو عارضی کیمپوں اور ریلیف کیمپس میں منتقل کیا جائے گا۔ ممکنہ طور پر متاثر ہونے والے علاقوں کی مساجد میں اعلانات کرکے مطلع کیاجارہا ہے ۔ ضلعی ایمرجینسی کنٹرول روم 24گھنٹے فعال رہے گا ۔
