کوئٹہ19اگست ( اے پی پی ): وزیراعلیٰ بلوچستان میر عبدالقدوس بزنجو نے کہا کہ اور ریکو ڈک معاہدہ بلوچستان میں سرمایہ کاری کے فروغ کی جانب اہم پیشرفت ہے ریکوڈک معاہدہ دنیا کے سرمایہ کار وں کو بلوچستان کی جانب متوجہ کریگا۔
ان خیالات کا اظہار انہوں نے اپنے زیر صدارت بلوچستان پبلک پرائیویٹ پارٹنر شپ بورڈ کے پہلے اجلاس سے خطاب کرتے ہوئے کہا، اجلاس وزیر اعلیٰ ہاؤس میں منعقد ہوا ۔ پارلیمانی سیکریٹری بشری رند چیف سیکریٹری عبدالعزیز عقیلی اور بورڈ کے دیگر اراکین نے اجلاس میں شرکت کی۔
ایم ڈی پی پی پی یونٹ ڈاکٹر نور محمد نے اجلاس کو بریفنگ دیتے ہوئے بتایا کہ موجودہ حکومت نے سبقت حاصل کرتے ہوئے، بی پی پی پی ایکٹ منظور کیا دنیا بھر میں پی پی پی کے تحت حکومت اور نجی شعبہ کی شراکت داری کو فروغ مل رہاہے، بلوچستان میں پی پی پی کے فروغ سے دنیا بھر سے سرمایہ کار بلوچستان کی جانب راغب ہونگے اور کہا کہ پی پی پی پی بورڈ کے اراکین کی تعداد 12 جس میں 3 اراکین نجی شعبہ سے ہیں ۔
اجلاس میں پی پی پی اتھارٹی کی ایگزیکٹو کمیٹی کے قیام کی منظوری بی پی پی پی اتھارٹی رولز 2022 کی منظوری بی پی پی پی اتھارٹی کے دیگر قانونی اور انتظامی امور کی بھی منظوری دے دی گئی اجلاس نے بی پی پی پی اتھارٹی کے بجٹ کی منظوری بھی دے دی۔
اجلاس میں پی پی پی کے تحت ابتدائی طور پر 15 منصوبوں کو قابل عمل بنانے کا فیصلہ بھی کیا گیا اور منصوبوں میں گرین بس سروس کوئٹہ ،گوادر میں 7 ایم جی ڈی سولر ڈی سیلینیشن پلانٹ،حب سپیشل اکنامک زون کی ترقی اور حب میں 100میگا واٹ سولر پارک شامل ہیں منصوبوں میں بوستان سپیشل اکنامک زون کی ترقی و فعالی سمیت دیگر اہم منصوبے شامل کئے گئے۔
وزیراعلیٰ بلوچستان نے کہا کہ بلوچستان کو خود انحصاری کی راہ پر گامزن کئےبغیر ترقی کے اہداف حاصل نہیں ہو سکتے خود انحصاری کے حصول کے لیے اپنے وسائل کی ترقی اور سرمایہ کاری کا فروغ ضروری ہے بدقسمتی سے ماضی میں خود انحصاری کے حصول کی جانب توجہ نہیں دی گئی ہم نے اپنی توجہ وسائل کی ترقی اور انہیں بلوچستان کی تعمیر و خوشحالی کے لیےبروئے کار لانے کی جانب مبذول کر رکھی ہے۔وزیراعلیٰ نے ہدایت کی کہ سرمایہ کاری کے فروغ کے لیے حکومتی پالیسی کو مزید جامع بنایا جا ئے، سرمایہ کاروں کو ہر قسم کی سہولیات اور ترغیبات دینے سے انکا اعتماد پختہ ہوگا ۔
