لاہور،26اکتوبر (اے پی پی):وزیراعلی پنجاب چودھری پرویز الہی کی زیر صدارت فیصل آباد ڈویژن کے ارکان قومی و صوبائی اسمبلی کا اجلاس منعقد ہوا۔ ارکان اسمبلی نے مختصر مدت میں پنجاب کے عوام کی فلاح و بہبود کے لئے مثالی اقدامات پر وزیر اعلی کے ویژن کو سراہا۔اجلاس میں اراکین اسمبلی کی تجاویز پر فیصل آباد ڈویژن میں نئی تحصیلوں کے قیام پر غور کیا گیا۔
چودھری پرویز الہی نے کچی آبادیوں کو مالکانہ حقوق دینے کے لئے اقدامات کی ہدایت کی اور واسا فیصل آباد کو کارکردگی بہتربنانے اور عوامی شکایات کے فی الفور ازالے کا حکم دیتے ہوئے کہا کہ فیصل آباد اور دیگر شہرو ں میں صفائی کی صورتحال کو بہتر بنایا جائے۔انہوں نے کہا کہ فیصل آباد ڈویژن کے زیر تکمیل منصوبوں کو جلد مکمل کرنے کے لئے فنڈز کی فراہمی یقینی بنائی جائے گی۔اسی طرح حسیب شہید ہسپتال اور جنرل ہسپتال سمن آباد سمیت ہیلتھ کے دیگر منصوبے جلد مکمل کئے جائیں گے۔
وزیراعلی ن نے کہا کہ فیصل آباد ڈویژن میں رابطہ سڑکوں کی تعمیر و مرمت کے پراجیکٹ ترجیحی بنیادوں پر مکمل کئے جائیں گے۔ فیصل آباد انسٹی ٹیوٹ آف کارڈیالوجی اور چلڈرن ہسپتال میں ڈاکٹروں کی کمی پوری اورواٹر فلٹریشن پلانٹ کے منصوبوں کو ترجیح دی جائے گی۔انہوں نے کہا کہ گرلز کالج کے قیام کا کوئی منصوبہ مسترد نہیں کیا جائے گا۔انہوں نے مغوی بچی کو جلد باز یاب کرانے پر فیصل آباد کے آرپی او،سی پی او اور تفتیشی ٹیم کوتعریفی اسناد دینے کی ہدایت کی۔
سپیکر پنجاب اسمبلی سبطین خان، سینئر صوبائی وزیر میاں اسلم اقبال، ارکان اسمبلی و پی ٹی آئی عہدیداران ریاض فتیانہ، غلام محمد لالی، رضا نصراللہ، خرم شہزاد، فیض اللہ کموکا، محبوب سلطان، امیر سلطان، غلام بی بی بھروانہ، فرخ حبیب، تیمور لالی، سلیم بی بی، علی افضل ساہی، علی اختر، چوہدری ظہیر الدین، عادل پرویز، حافظ ممتاز احمد، رانا عمر فاروق، خیال احمد کاسترو، شکیل شاہد، وارث عزیز، لطیف نذر، سعید احمد سعیدی، آشفہ ریاض فتیانہ، سونیا علی رضا، تیمور بھٹی، اعظم چیلہ، مہر نواز بھروانہ، غضنفر عباس شاہ، آصف کاٹھیااور شہباز خان نے اجلاس میں شرکت کی۔
