اوکاڑہ۔ 01 دسمبر (اے پی پی):ڈپٹی کمشنرعرفان علی کاٹھیانے کہا ہے کہ ریونیوعوامی خدمت کچہری کا بنیادی مقصد عام لوگوں کے زمین جائیداد سے متعلقہ معاملات کو فوری طور پر حل کرنے کے لئے اقدامات کرنا ہے لوگوں کے لئے آسانی اور سہولت ہر سرکاری محکمے کی بنیادی ذمہ داری اور افسران کا فرض ہے ۔ان خیالات کا اظہار انہوں نے ضلع کونسل میں ریونیو عوامی خدمت کچہری میں آنے والے سائلین کی درخواستوں پر احکامات جاری کرتے ہوئے کیا ۔اس موقع پر ایڈیشنل ڈپٹی کمشنر ریو نیو ظہیر لیاقت بیگ ،اسسٹنٹ کمشنر آمنہ احسان سمیت متعلقہ افسران اور محکمہ مال کا فیلڈ عملہ بھی موجود تھا ۔ ڈپٹی کمشنر عرفان علی کاٹھیانے کہا کہ ریونیو عوامی خدمت کچہری جہاں لوگوں کے محکمہ مال سے متعلقہ مسائل کے فوری حل کی ایک کاوش ہے وہیں پر عام لوگوں کو سرکاری دفاتر سے متعلقہ مسائل و مشکلات کے حل کے لئے ایک موثر پلیٹ فارم ہے ریونیو کھلی کچہری میں آنے والے سائلین کی درخواستوں پر فوری ایکشن کے لئے متعلقہ اداروں کو ہدایات جاری کی جاتی ہیں اور اس سلسلہ میں ان سے رپورٹ بھی طلب کی جاتی ہے تاکہ لوگوں کے مسائل اور مشکلات مستقل بنیادوں پر حل ہو سکیں۔ انہوں نے کہا کہ سرکاری ادارے عوام کو ریلیف فراہم کرنے کے لئے تما م وسائل بروئے کار لائیں، افسران اوپن ڈور پالیسی پر عمل در آمد کرتے ہوئے اپنے دفاتر سے متعلقہ لوگوں کے مسائل ترجیحی بنیادوں پر حل کریں۔
