ملتان 11، جنوری (اے پی پی ): تعلیمی بورڈ ملتان کی میزبانی میں آل پاکستان انٹر بورڈز ہینڈ بال چیمپئن شپ کا انعقاد ملتان بورڈ کیمپس گراؤنڈ پر ہوا ۔میزبان بورڈ ملتان کے چیئرمین حافظ محمد قاسم نے ایونٹ کا افتتاح کیا۔اس موقع پر ایونٹ میں شریک مالا کنڈ۔ گوجرانوالہ۔ سوات ۔بنوں اور ملتان بورڈز کے آفیشلز بھی موجود تھے۔چیئرمین حافظ محمد قاسم نے اپنے خطاب میں کہا کہ پاکستان بورڈ ہینڈ بال چیمپئن شپ کا ملتان میں انعقاد ہمارے لیے اعزاز ہے۔ انہوں نے کہا کہ ملتان بورڈ کی ٹیمیں اب تک ہونیوالے مختلف کھیلوں کے آل پاکستان مقابلوں میں بہترین کارکردگی کا مظاہرہ کر کی ہیں۔ جمناسٹک میں ملتان نے پہلی اور لان ٹینس میں تیسری پوزیشن حاصل کی ہے میزبان ملتان بورڈ کے انچارج سپورٹس ملک نثار نے آل پاکستان انٹر بورڈز ہینڈ بال چیمپئن شپ بارے بریفنگ میں بتایا کہ سنگل لیگ بنیادپرایونٹ میں 5تعلیمی بورڈز کی ٹیمیں حصہ لے رہی ہیں۔بعد ازاں پہلے روز 5لیگ میچوں کا فیصلہ ہوا۔ ملتان نے اپنے دونوں میچز جیت لیے۔ گوجرانوالہ اور مالا کنڈ نے ایک میچ جیتا اور ایک میں شکست کھائی۔ بنوں اور سوات کواپنے دونوں لیگ میچز میں شکست کا سامنا کرنا پڑا ۔ایونٹ کے دوسرے روز آج بھی پانچ لیگ میچز کھیلے جائیں گے۔
