اوکاڑہ،10فروری (اے پی پی): ڈپٹی کمشنر ڈاکٹر محمد ذیشان حنیف نے کہا ہے کہ ضلع میں آٹے کے تمام سیلز پوائنٹس اور ٹرک پوائنٹ پر آنے والے صارفین کو احسن انداز میں مقررہ نرخوں پر آٹا ملنا چاہیے اور اس سلسلہ میں لوگوں کی شکایات کو فوری طور پر دور کیا جائے، مارکیٹ میں آٹے کی فراہمی کے تسلسل میں کسی صورت کمی نہیں آنی چاہیے۔ ان خیا لات کا اظہارانہوں نےپرائس مجسٹریٹس کے اجلاس کی صدارت کرتے ہوئے کیا۔ اس موقع پر ڈسٹرکٹ فوڈ کنٹرولر نے بتایا کہ ضلع میں کسی جگہ بھی آٹا کا بحران نہیں ہے، مارکیٹ میں لوگوں کو روزانہ کی بنیاد پر 25 ہزار سے زائد آٹے کے تھیلے فراہم کئے جا رہے ہیں اور کہا کہ سیل پوائنٹس پر لوگوں کا رش عام مارکیٹ اور سیل پوائنٹ پر آٹے کی قیمتوں کے فرق کی وجہ سے ہے،سیل پوائنٹس پرعام صارفین کو 10 کلو آٹے کا تھیلا 664 روپے میں فراہم کیا جا رہا ہے جبکہ مارکیٹ میں آٹے کی قیمت زیادہ ہے جس کی وجہ سے سیلز پوائنٹس پر لوگوں کا رش ہے۔انہوں نے بتایا کہ اس وقت ضلع میں آٹے کے ٹرک سیل پوائنٹس 39 ہیں جبکہ ضلع کی تینوں تحصیلوں میں 119 سیلز پوائنٹس پر آٹا دستیاب ہے۔
