فیصل آباد،05فروری(اے پی پی ):حکومت پنجاب کی ہدایات پرشہداء پشاورکو خراج عقیدت پیش کرنے کے لئے شمعیں روشن کی گئیں۔ڈویژنل کمشنر سلوت سعید،ڈپٹی کمشنر عمران حامد شیخ اور سٹی پولیس آفیسر سید خالد محمود ہمدانی نے باغ جناح میں سول سوسائٹی کے افراد کے ہمراہ شہداء کی قربانیوں کو خراج عقیدت پیش کیا اور گلدستے رکھے۔
ڈویژنل کمشنر نے سانحہ پشاور کے شہداء کو سلام پیش کیا اور کہا کہ وطن عزیز کی حفاظت کی خاطر قیمتی جانوں کا نذرانہ پیش کرنے والوں کی قربانیاں رائیگاں نہیں جائیں گی اور دہشتگردی کے عفریت پرانشاء اللہ قابو پائیں گے۔انہوں نے کہا کہ ہم سب متحد ہیں اور وطن کی بقاء کی خاطر کسی قربانی سے دریغ نہیں کیا جائے گا۔
ڈپٹی کمشنر اور سی پی او نے پشاور سانحہ میں شہید ہونے والوں کو سلام پیش کرتے ہوئے کہا کہ پاکستان کے سیکیورٹی ادارے وطن عزیز کی سلامتی کے لئے اپنی جان ہتھیلی پررکھ پر سروسز فراہم کررہے ہیں۔انہوں نے سانحہ کے غازیوں کے لئے دعابھی کی۔
ایڈیشنل ڈپٹی کمشنر جنرل فیصل سلطان،ایس پی صدر ڈویژن شمس الحق درانی کے علاوہ ضلعی وپولیس افسران بھی شریک تھے۔
