سیالکوٹ،17مارچ (اے پی پی):ڈپٹی کمشنر عدنان محمود اعوان نے کہا ہے کہ حکومت پنجاب کی ہدایت پر مستحق شہریوں کو مفت آٹا کی فراہمی (کل) ہفتہ کو صبح 9 بجے سے شروع کر دی جائیگی، بے انظیر انکم سپورٹ پروگرام میں رجسٹرڈافراد مفت آٹا کے حصول کے حقدار ہونگے،ضلع سیالکوٹ میں کل پانچ لاکھ 20ہزار خاندان اس سہولت سے مستفید ہو سکیں گے، آٹا سپلائی کے لیے 26 ٹرکنگ پوائنٹس قائم کر دیے گئے ہیں، ہر پوائنٹ پر 10 کاؤنٹر قائم ہوں گے جہاں سے بی آئی ایس میں رجسٹرڈ تصدیق شدہ افراد آٹا حاصل کر سکیں گے۔
ان خیالات کا اظہار انہوں نے فلور ملز مالکان کے اجلاس سے خطاب کرتے ہوئے کیا۔ اے ڈی سی ریونیو محمد اقبال، ڈی ایف سی نصراللہ ندیم بھی موجود تھے۔ ڈپٹی کمشنر عدنان محمود اعوان نے کہا کہ ٹرکنگ پوائنٹس پر آنے سے پہلے شہری اپنا شناختی کارڈ نمبر 8070پرمسیج کرکے خودبھی تصدیق کرسکتے ہیں کہ وہ بی آئی ایس پی میں رجسٹرڈ ہیں تاہم کاؤنٹر پر موجود عملہ اینڈرائیڈ فون کے ذریعے تصدیق کے بعد ٹوکن جاری کرے گا، تصدیق شدہ فرد ٹوکن لیکر ٹرک والے کے پاس چلا جائے گا جو ٹوکن اپنے پاس رکھ کر آٹے کا بیگ دے دیگا۔ ڈپٹی کمشنر نے بتایا کہ تحصیل سیالکوٹ میں کل13 ٹرکنگ پوائنٹس بنائے گئے ہیں، یہ پوائنٹس کمانوالہ یونین کونسل، یونین کونسل دفتر چپراڑ، آر ایچ سی کاہلیاں، کمیونٹی سنٹر کوٹلی لوہاراں، یونین کونسل دفتر برتھ والا، شاہ ولی مارکیٹ سیداں والی چوک، یونین کونسل آفس بھاگوال، یونین کونسل دفتر عدالت گڑھا، ہاکی اسٹیڈیم پسرور روڈ، انوار کلب کچہری روڈ، وینس میرج ہال سبلائم چوک، الیاس مارکی ائیر پورٹ روڈ اور یونین کونسل دفتر اگوکی میں بنائے گئے ہیں۔ انہوں نے بتایا کہ تحصیل پسرور میں 6 ٹرکنگ پوائنٹس قائم ہونگے ان میں ایم سی پارک پسرور، چوک شہیداں چونڈہ، یونین کونسل دفتر بڈیانہ، یونین کونسل دفتر چوبارہ، یونین کونسل دفتر چوبارہ اور یونین کونسل دفتر چونڈہ، تحصیل ڈسکہ میں پانچ ٹرکنگ پوائنٹس سروس روڈ نزد جی پی او دفتر ڈسکہ، چونگی نمبر 8 ڈسکہ، یونین کونسل دفتر جامکے چیمہ، سرنوالی اور چوک بھالوالی، تحصیل سمبڑیال میں نزد ریسکیو اسٹیشن سمبڑیال اور یونین کونسل دفتر بھوپال والا میں بنائے گئے ہیں۔ ڈپٹی کمشنر عدنان محمود اعوان نے شہریوں سے کہا کہ وہ آٹا فراہمی کیلئے بنائے گئے پوائنٹس پر نظم و ضبط کامظاہرہ کریں اوروہاں تعینات سٹاف کے ساتھ تعاون کریں۔
