لاہور30مئی ( اے پی پی ): نگران وزیراعلیٰ پنجاب محسن نقوی کی زیر صدارت وزیراعلیٰ آفس میں منعقدہ اجلاس میں کپاس کی بوائی و پیداوار بڑھانے کے اقدامات کا جائزہ لیا گیا۔ نگران وزیراعلیٰ محسن نقوی نے صوبہ بھر میں جعلی زرعی ادویات کے سدباب کے لئے کریک ڈاؤن کا حکم دیتے ہوئے ہدایت کی کہ پولیس اور متعلقہ محکمے جعلی ادویات تیار و فروخت کرنے والوں کے خلاف بلامتیاز کارروائی کریں۔ کا شتکار کے استحصال کی اجازت نہیں دیں گے۔ اجلاس میں کپاس کے کاشتکاروں کو امدادی نرخ پرزرعی ادویات کی فراہمی کی تجویز پر اتفاق کیا گیا اور پنجاب بینک کے”شاندار کپاس پروگرام“ کے تحت کاشتکاروں کو آسان شرائط پر قرض دینے کی تجویز کا جائزہ لیا گیا۔ بریفنگ کے دوران اجلاس کو بتایا گیا کہ کاٹن کراپ مینجمنٹ کیلئے ایگریکلچر انٹرن شپ پروگرام شروع کیا جارہا ہے جبکہ ینگ ایگریکلچرگرایجویٹس کے ذریعے کاٹن کراپ مینجمنٹ ایڈوائزری سروس شروع کی جائے گی اور ملتان میں انٹرنیشنل کاٹن کانفرنس منعقدہوگی۔ کمشنر بہاولپور ڈویژن نے بریفنگ دیتے ہوئے بتایا کہ بہاولپور میں 208400ایکڑ رقبے پر کپاس کی ریکارڈ بوائی مکمل ہوچکی ہے۔ اپٹما نے گزشتہ برس کی نسبت رواں برس زیادہ رقبے پر کپاس کی بوائی پر نگران وزیراعلیٰ محسن نقوی اوران کی ٹیم کو خراج تحسین پیش کیا۔ ماہرین نے اپنی آراء کا اظہار کرتے ہوئے کہا کہ اچھی فصل کیلئے ڈی اے پی،فاسفیڈ اوریوریا کھادوں کا استعمال ضروری ہے۔سیکرٹری زراعت، سیکرٹری آبپاشی، سیکرٹری خزانہ، اپٹما کے عہدیدار فواد مختار، انوار غنی، کمشنر لاہور ڈویژن، چیئرمین پنجاب انفارمیشن ٹیکنالوجی بورڈ، محکمہ زراعت کے حکام نے اجلاس میں شرکت کی جبکہ ملتان، بہاولپور، ڈیرہ غازی خان، فیصل آباد، سرگودھا، ساہیوال کے کمشنرز اور وائس چانسلر یونیورسٹی آف ایگریکلچر فیصل آباد ویڈیو لنک کے ذریعے اجلاس میں شریک ہوئے۔
