پشاور، 31مئی(اے پی پی): کمشنر پشاور ڈویژن محمد زبیر نے کہا ہے کہ نگران صوبائی حکومت نے پشاور کو نشے کے عادی افراد سے پاک کرنے کا فیصلہ کرلیا ہے اور کمشنر پشاور ڈویژن محمد زبیر کو یہ ٹاسک حوالے کردیا ہے۔ نشے سے پاک پشاور مہم فیز 3 اگلے ماہ سے شروع کی جائے گی ۔ مہم کے لئے غیر سرکاری اور فلاحی تنظیموں سے مدد لی جائے گی۔ان خیالات کا اظہار کمشنر پشاور ڈویژن محمد زبیر کی زیر صدارت اجلاس میں ہوا جس میں کئی اہم فیصلے کیے گئے۔
کمشنر پشاور ڈویژن محمد زبیر نے کہا کہ مہم کے پہلے مرحلے میں پشاور کی سڑکوں پر موجود 1200 سے زائد نشے کے عادی افراد کو تحویل میں لیکر بحالی مراکز منتقل کیا جائے گا۔
انہوں نے کہا کہ نشے کے عادی افراد کو مستقل نشے سے چھٹکارا دلانے کے لیے علاج کا دورانیہ 6 سے 8 رکھنے کا فیصلہ کیا گیا ہے۔
اجلاس میں ڈپٹی کمشنر پشاور، ڈسٹرکٹ آفیسر سوشل ویلفیئر سمیت غیر سرکاری تنظیموں کے نمائندوں نے شرکت کی جنکو مہم کے لئے تجاویز مرتب کرکے کمشنر پشاور ڈویژن افس کو ارسال کرنے کی ہدایات بھی کی گئیں۔
