تھرپارکر، 6 جون( اے پی پی ): تھر میں تعلیمی معیار کو بہتر بنانے کے لیے تھر فاؤنڈیشن اور دی سٹیزن فاؤنڈیشن (TCF) نے اساتذہ کی تربیت کا آغاز کر دیا ہے، جس کا افتتاح وزیر مملکت و ایم این اے ڈاکٹر مہیش کمار ملانی نے کیا۔ تقریب سے خطاب کرتے ہوئے ڈاکٹر مہیش ملانی نے تعلیم کے لیے تھر فاؤنڈیشن کی کاوشوں کو سراہتے ہوئے کہا کہ مٹھی، اسلام کوٹ اور گاؤں سنہری درس میں تھر فاؤنڈیشن کے بہترین اسکول موجود ہیں جہاں بچیاں بطور ٹیچر تعلیم دے رہی ہیں جو کہ ایک انتہائی حوصلہ افزا عمل ہے۔ انہوں نے کہا کہ تربیت کا بنیادی مقصد خواتین اساتذہ کی پڑھنے اور پڑھانے کی صلاحیت کو بڑھانا ہے جس سے طالبات کو کافی فائدہ پہنچے گا، اساتذہ کو تنخواہوں میں اضافے سمیت مزید سہولیات دی جانی چاہیے تاکہ وہ اپنے مستقبل محفوظ سمجھیں ، تھر میں بچیوں کی تعلیم کو فروغ دینے کی ضرورت ہے، انگریزی اور اردو کے ساتھ ساتھ مادری زبان میں بھی پڑھانا ایک مثبت قدم ہے، بچوں کو عملی تعلیم کی طرف راغب کیا جائے اور پریکٹیکلز کروائے جائیں، جس سے سیکھنے کا عمل بڑھے اور بچوں میں قابلیت پیدا ہو۔
اس موقع پر خطاب کرتے ہوئے تھر فاؤنڈیشن کے جنرل منیجر فرحان انصاری نے ٹی سی ایف کی انتظامیہ کو تمام اسکولوں کو بہتر طریقے سے چلانے پر مبارکباد پیش کی اور کہا کہ ان کی کوشش ہے کہ متعلقہ شعبے کے پیشہ ور افراد کو بہتر نتائج حاصل کرنے کے لیے کام دیا جائے۔ سیکھنے اور بہتری کی ہمیشہ گنجائش رہتی ہے، اس بات کو ذہن میں رکھتے ہوئے کہ خواتین اساتذہ کو تربیت دی جا رہی ہے۔ بچوں کی تعلیم اور صلاحیت کا دارومدار اہل اساتذہ پر ہوتا ہے، جس کے لیے اساتذہ کو تربیت دی جا رہی ہے، انہوں نے کہا کہ اب تھر میں انڈسٹری کی آمد کے بعد ترقی کے پیمانے بدل رہے ہیں، مقامی لوگوں کے لیے ترقی اور مقابلے کے میدان وسیع ہو گئے ہیں، ان کی خواہش ہے۔ کہ تھر سے قابل بچے پیدا ہو کر آگے آئیں اور ان صنعتوں میں اعلیٰ عہدوں پر پہنچ کر قیادت کا کردار ادا کریں۔
