گوجرانوالہ،30 جولائی(اے پی پی): وزیراعلیٰ محسن نقوی نے لاہور،سیالکوٹ موٹروے سے گوجرانوالہ کو لنک دینے کے منصوبے کا دورہ کیا اور لنک روڈپراجیکٹ پر جاری تعمیراتی کاموں کا معائنہ کیا۔انہوں نے کام کی رفتار مزید تیز کرنے اوراعلیٰ تعمیراتی معیارکو یقینی بنانے کی ہدایت کی اور منصوبے کو مقررہ مدت میں مکمل کرنے کیلئے ضروری ہدایات دیں۔انہوں نے گوجرانوالہ موٹر وے لنک روڈ پراجیکٹ کی زیر تعمیرسڑک کا بھی دورہ کیا۔
وزیراعلیٰ کو بریفنگ میں بتایاگیا کہ 11 ارب روپے کی لاگت کے اس منصوبے کی جلد تعمیر میں حائل مسائل خوش اسلو بی سے حل کر لئے گئے ہیں۔ 15.2 کلو میٹر طویل دو رویہ کا ر پٹیڈ سڑک مو ٹر وے کے لئے بہترین رسائی فراہم کرے گی۔ منصوبے کو 90 دنوں کے اندر مکمل کرنے کے لئے تمام وسائل برو ئے کار لا رہے ہیں۔ جدید سفری سہولیات سے وقت اور ایندھن کی بچت اور جی ٹی روڈ پر ٹریفک رش کم ہو گا۔ ایف ڈبلیو او کے حکام نے وزیراعلیٰ محسن نقوی کو پراجیکٹ کے بارے میں بریفنگ دی۔
وزیراعلیٰ محسن نقوی نے گوجرانوالہ موٹر وے لنک روڈ پراجیکٹ کے دورے کے بعد میڈیا سے گفتگوکرتے ہوئے کہا کہ بارشوں کے باوجود یہ پراجیکٹ اپنے مقررہ وقت میں مکمل کیا جائے گا، بارشوں کے باعث کام میں کچھ تاخیر ہوئی لیکن اسے دن رات کام کرکے پورا کیا جائے گا،گوجرانوالہ کو جلد موٹر وے سے لنک کر دیا جائے گا۔انہوں نے کہا کہ انتخابات الیکشن کمیشن کا کام ہے جب وہ کہیں گے ہو جائیں گے۔
وزیراعلیٰ محسن نقوی نے کہا کہ گوجرانوالہ کے دونوں ہسپتالوں کے درمیان شٹل سروس شروع ہو چکی ہے۔ہسپتالوں میں ایچ آر کی کمی کو پورا کیا جائے گا۔ اسلامیہ یونیورسٹی بہاولپور کے واقعہ کی ابتدائی تحقیقات مکمل ہوچکی ہے،ذمہ داروں کوسخت سزا ملے گی،ضرورت پڑی توجوڈیشل انکوائری بھی کرائیں گے،پولیس کو مکمل بااختیار بنایا ہے۔
دورہ کے دوران نگران وزیراعلیٰ پنجاب محسن نقوی نے گوجرانوالہ موٹر وے لنک روڈ پراجیکٹ کا فضائی جائزہ بھی لیا۔انہوں نےواہنڈوانٹرچینج سے بے نظیرچوک تک 15کلومیٹر طویل موٹر وے لنک روڈکافضائی معائنہ کیا اور زیر تعمیر گوجرانوالہ موٹر وے لنک روڈ پراجیکٹ کے مختلف حصے دیکھے۔ انہوں نے سیکرٹری تعمیرات و مواصلات کو موقع پر ہی ضروری ہدایات بھی دیں۔
صوبائی وزیر بلال افضل،چیف سیکرٹری، کمشنر گوجرانوالہ ڈویژن،آر پی او، سیکرٹری تعمیرات و مواصلات،ڈی سی،ڈی پی او اوردیگر افسران بھی اس موقع پر موجود تھے۔
