لاہور،23 جولائی (اے پی پی):نگران وزیراعلی ٰپنجاب محسن نقوی سے فرانس کے سفیر نکولیس گیلی نے اتوار کو یہاں وزیراعلی ٰآفس میں ملاقات کی،جس میں باہمی دلچسپی کے امور، دو طرفہ تعاون کے فروغ اور مختلف شعبوں میں تعاون بڑھانے پر تبادلہ خیال کیاگیا۔
وزیراعلیٰ محسن نقوی نے اس موقع پر گفتگو کرتے ہوئے کہا کہ پاکستان اورفرانس کے درمیان بہترین دوستانہ تعلقات موجود ہیں۔دونوں ملکوں کے مابین معاشی،تجارتی اوردیگر شعبو ں میں تعلقات کو پائیدار بنیادوں پر فروغ دینے کی ضرورت ہے۔ ثقافت، سیاحت اور واٹر ٹریٹمنٹ کے حوالے سے فرانس کے تعاون کو قدر کی نگاہ سے دیکھتے ہیں۔انہوں نے کہا کہ صوبائی افسروں ا ور ہسپتالوں کے میڈیکل سپرنٹنڈنٹس کو مینجمنٹ سکلز کے حوالے سے ٹریننگ فراہم کرنے کے حوالے سے فرانس کے تعاون کاخیر مقدم کریں گے۔ زرعی شعبہ کو توانا کرنے اور پیداوار بڑھانے کے حوالے سے فرانس کی مہارت سے استفادہ کرنا چاہتے ہیں۔تاریخی عمارتوں کی بحالی کے پروگرام میں معاونت پر فرانس کے شکر گزار ہیں۔
نگران وزیراعلی ٰپنجاب محسن نقوی نے کہا کہ پنجاب حکومت نے والڈ سٹی آف لاہور اتھارٹی کو5 مزیدتاریخی عمارتوں کی بحالی کا ٹاسک دیا ہے۔
فرانسیسی سفیرنے کہا کہ تاریخی عمارتوں کی بحالی کے پروگرام میں پنجاب حکومت کے ساتھ تعاون کو مزید بڑھائیں گے، پنجاب حکومت کے ساتھ ٹریننگ پروگرام شروع کرنے کاجائزہ لیں گے، فرانس پنجاب حکومت کے ساتھ ہر سطح پر تعاون جاری رکھے گا۔
