ڈی جی خان،20 جولائی (اے پی پی ): ڈی جی خان ڈویژن میں مون سون بارشوں سے نمٹنے کیلئے محکموں کو الرٹ کردیا گیا۔کمشنر ڈاکٹر ناصر محمود بشیر نے ویڈیو لنک اجلاس کی صدارت کرتے ہوئے ڈویژن بھر کے افسران کو اربن فلڈنگ اور نشیبی علاقوں سے بارش کے پانی کی فوری نکاسی کے احکامات جاری کردئیے۔
کمشنر ڈاکٹر ناصر محمود بشیر نے کہا کہ ڈی جی خان ڈویژن میں میونسپل سروسز کے معاملات بہتر کئے جائیں،افسران عوامی مسائل کے بروقت حل کو ترجیح دیں،سرکاری فرائض کی انجام دہی میں کوتاہی اور عدم دلچسپی برداشت نہیں ہوگی۔انہوں نے کہا کہ ڈپٹی کمشنرز اور متعلقہ افسران مراکز صحت کے اچانک معائنے کریں۔
کمشنر ڈاکٹر ناصر محمود بشیر نے کہا کہ ڈی جی خان ڈویژن میں کپاس کی کاشت میں اچھا کام ہوا ہے،ٹارگٹ سے زائد رقبہ پر کپاس کی کاشت ہوئی ہے،حکومت پنجاب امدادی قیمت پر کپاس کی خریداری کےلئے بھی سخت اقدامات کرے گی۔
کمشنر ڈاکٹر ناصر محمود بشیر نے کہا کہ چیف سیکرٹری پنجاب کے 26 انیشیٹوز پر سختی سے عملدرآمد کرایا جائے،محرم الحرام کے دوران قواعد و ضوابط پر سختی کی جائے ۔
ڈپٹی کمشنرز مہر شاہد زمان لک ،محمد سلمان لودھی،خالد پرویز اور ڈاکٹر منصور بلوچ،ایڈیشنل کمشنر کوارڈینیشن کریم بخش اور دیگر افسران موجود تھے۔ اجلاس میں محرم الحرام ،پرائس کنٹرول،کپاس کی کاشت،کسان سہولت سنٹرز اور دیگر معاملات کا جائزہ لیا گیا۔
