اسلام آباد،14اگست(اے پی پی):دبئی سے سکردو پہلی بین الاقوامی پرواز کی آمد کے بعد سکردو ہوائی اڈہ ، بین اقوامی ائیرپورٹ بن گیا ہے ،پی کے 234 پاکستان انٹرنیشنل ایئر لائن پی آئی اے کی سکردو کے لئے پہلی بین الاقوامی پرواز ہے جو دبئی سے سکردو لینڈ کر گئی ہے۔
پی آئی اے کے ترجمان عبداللہ حفیظ خان کی طرف سے جاری بیان کے مطابق یوم آزادی کے موقع پر پی آئی اے نے گلگت بلتستان کے عوام کے لئے ایک خاص تحفہ ہے جس کے بعد ہفتہ وار پروازوں کی آمدورفت کا سلسلہ شروع ہو گیا ہے ۔
ترجمان نے کہا کہ پرواز کے اترنے کو بعد سکردو کو ایک بین القوامی ائیر پورٹ کا درجہ مل گیا ہے۔ ان پروازوں کے آغاز سے قومی ائیر لائن پی آئی اے نے ایک اور اعزاز حاصل کر لیا ہے اور سکردو کو پوری دنیا میں متعارف کروایاہے۔بین الاقوامی پرواز پر سیاحوں کو جنت نظیر گلگت بلتستان کے دلکش نظاروں سے لطف اندوز ہونے کا سنہری موقع فراہم ہو گیا ہے۔دوران پرواز سیاحوں کو ہمالیہ کے برف پوش پہاڑوں بشمول کے ٹو اور نانگہ پربت کے خوبصورت نظارے بھی دیکھنے کو ملے۔
ترجمان نے کہا کہ پی آئی اے کی دبئی سے سکردو کی ہفتہ وار پروازیں پاکستان کے شمالی علاقہ جات کی سیاحت کے فروغ میں اہم کردار ادا کریں گی۔سیاح اب دبئی سے براہ راست ساڑھے تین گھنٹے کی پرواز سے سکردو پہنچ سکیں گے۔
سکردو ایئر پورٹ پر ایک سادہ مگر پروقار تقریب کا اہتمام کیا گیا۔ مسافروں کا استقبال پی آئی اے کے چیف ایگزیکٹو آفیسر ائیر وائس مارشل عامر حیات، سول ایوی ایشن کے اعلیٰ حکام اور دیگر سیاسی و سماجی شخصیات اور سرکاری حکام نے کیا۔ مسافروں میں گلگت بلتستان کی روائتی ٹوپیاں اور تحائف بھی تقسیم کئے گئے۔جہاز کو آمد پر ائیرپورٹ حکام کی جانب سے واٹر کینن سلوٹ بھی پیش کیا گیا۔ جہاز کے کپتان نے کاک پٹ کا شیشہ کھول کر جشن آزادی کی مناسبت سے قومی جھنڈا بھی لہرایا۔
