کوئٹہ، 23اگست (اے پی پی ): نگراں وزیر اعلیٰ بلوچستان میر علی مردان خان ڈومکی نے کہا ہے کہ گرین بس سروس کا آغاز سابق صوبائی حکومت کا بہترین اقدام ہے، ہم گرین بس سروس کو شہر کے دیگر علاقوں تک توسیع دینگے۔
ان خیالات کا اظہار انہوں نے گرین بس میں سفر کے دوران مسافروں سے گفتگوکرتے ہوئے کیا۔انہوں نے کہا کہ خوشگوار ماحول میں محفوظ سفر شہریوں کا حق ہے، خوشی ہے کہ ہماری مائیں بہنیں بیٹیاں اب اطمینان کے ساتھ سفر کر سکتی ہیں۔
مسافروں کی جانب سے گرین بس سروس شروع کرنے پر صوبائی حکومت کا شکریہ ادا کیا گیا اور مسافروں نے نگران وزیراعلیٰ سے درخواست کی کہ شہر میں مزید روٹس پر بھی گرین بس سروس کا آغاز کیا جائے۔ جس پر نگران وزیراعلیٰ نے سیکریٹری ٹرانسپورٹ کو فوری طور پر پلان پیش کرنے کی ہدایت کی۔
اس موقع پر نگراں وزیر اعلیٰ نے گرین بس سروس کے شام کے اوقات میں ایک گھنٹہ توسیع دینے کا بھی اعلان کیا۔
