اسلام آباد،24اکتوبر(اے پی پی):وفاقی وزیر ریلویز شاہد اشرف تارڑ کی زیر صدارت اجلاس منعقد ہوا جس دوران پاکستان ریلویز کی کارکردگی، آپریشنل اور انتظامی امور کا جائزہ لیا گیا۔
دوران اجلاس وفاقی وزیر ریلویز شاہد اشرف تارڑ نے راولپنڈی ریلوے سٹیشن کمرشلائزیشن ایکشن پلان ٹائم لائن کے ساتھ جلد پیش کرنے کی ہدایت کی۔انہوں نے کہا کہ ریلوے سٹیشن کی کمرشلائزیشن منصوبے کو مرحلہ وار مکمل کیا جائیگا۔
اجلاس میں تمام کیٹیگری اے کے ریلوے اسٹیشنوں پر (بی او ٹی) کی بنیاد پر ایگزیکٹیو ٹوائلٹس بنانے کا فیصلہ کیا گیا۔وفاقی وزیر نے کہا کہ ریلوے میں ای آر پی کے نفاذ سے ریلوے میں مالیاتی کارکردگی میں بہتری آئی ہے۔
وفاقی وزیر ریلویز شاہد اشرف تارڑ نے ریلوے میں ایندھن کی استعداد کار بڑھانے کے لیے آن لائن فیول مینجمنٹ سسٹم کو ترجیحی بنیادوں پر نافذ کرنے کی ہدایت کی۔وفاقی وزیر نے مسافروں اور مال بردار ٹرینوں کی آمدن میں 17 فیصد اضافہ حاصل کرنے پر ریلوے ٹیم کو بھی سراہا۔
