اسلام آباد، 03نومبر(اے پی پی ): پاکستان نیول اکیڈمی کی ٹیم نے چوتھے انٹرنیشنل ناٹیکل مقابلوں میں کامیابی حاصل کر لی ہے ۔
پاک بحریہ کے زیر انتظام چوتھے انٹرنیشنل ناٹیکل مقابلوں کی اختتامی تقریب کاانعقاد کیا گیا، پاکستان نیول اکیڈمی کی ٹیم اس ایونٹ کی فاتح قرار پائی، کمانڈر کراچی ریئرایڈمرل محمد سلیم اختتامی تقریب کے مہمان خصوصی تھے،مہمان خصوصی نے جیتنے والے کھلاڑیوں میں انعامات تقسیم کیے۔
ترجمان پاک بحریہ کے مطابق ایونٹ میں کشتی رانی، تیراکی، سمندر میں جان بچانے اور سی مین شپ کے مقابلے شامل تھے۔ ان مقابلوں میں پاکستان، آذربائیجان، چین، انڈونیشیا، اٹلی، سعودی عرب، ایران، عمان اور ترکیہ کی ٹیموں نےحصہ لیا۔ ان مقابلوں کا مقصد پاکستان میں بحری کھیلوں کے فروغ کے ساتھ ساتھ دوست ممالک کے زیر تربیت افسران کے مابین مقابلوں کی حوصلہ افزائی کرنا ہے۔
تقریب میں اعلیٰ سول و عسکری افسران، سفارتکاروں اور کھلاڑیوں نے بڑی تعداد میں شرکت کی۔
