پشاور،13 نومبر(اے پی پی): خیبرپختونخوا کی نگران صوبائی کابینہ کے 9 ارکان نے بحیثیت صوبائی وزراء اپنے عہدے کاحلف اٹھا لیا، اس ضمن میں صوبائی کابینہ کی تقریب حلف برداری آج گورنر ہاوس پشاور میں منعقد ہوئی۔
گورنر خیبرپختونخوا حاجی غلام علی نے نگران صوبائی وزراءسے ان کے عہدے کا حلف لیا، جبکہ نگران وزیراعلیٰ جسٹس (ر) سید ارشد حسین شاہ بھی تقریب حلف برداری میں شریک تھے۔بحیثیت نگران صوبائی وزیر حلف لینے والوں میں سید مسعود شاہ، جسٹس(ر) ارشاد قیصر، احمد رسول بنگش، آصف رفیق، ڈاکٹر نجیب اللہ، ڈاکٹر محمد قاسم جان، انجینئر عامر ندیم درانی، انجینئر احمد جان اور سید عامر عبداللہ شامل ہیں۔گورنر خیبرپختونخوا حاجی غلام علی نے نگران صوبائی وزراءکو مبارکباد دیتے ہوئے نیک تمناوں کا اظہار کیا۔
تقریب میں چیف سیکرٹری ندیم اسلم چوہدری، انسپکٹر جنرل پولیس اختر حیات خان گنڈا پور،انتظامی محکموں کے سربراہان سمیت سیاسی وسماجی شخصیات نے شرکت کی۔
