اسلام آباد،9دسمبر (اے پی پی):وزیراعظم کی معاون خصوصی برائے انسانی حقوق و ترقی نسواں مشعال حسین ملک نے کہا ہے کہ فاشسٹ مودی اور نیتن یاہو کے نظریات عالمی امن کے لیے خطرہ ہیں، ہندوستانی قبضے سے آزادی مقبوضہ جموں و کشمیر کی اصل منزل اور مقدر ہے۔
وہ انٹرنیشنل ہیومن رائٹس آبزرور کے زیر اہتمام انسانی حقوق کے عالمی دن کی کانفرنس2023 سے خطاب کر رہی تھیں۔مشعال ملک نے کہا کہ بھارتی کے غیر قانونی زیرقبضہ مقبوضہ جموں و کشمیر کے عوام کی عزت نفس طاقت کے بے دریغ استعمال، غیر قانونی نظربندیوں، سیاسی ظلم و ستم، نقل و حرکت پر پابندیوں، جبری گمشدگیوں، ماورائے عدالت قتل اور عصمت دری سے روزانہ کی بنیاد پر مجروح ہو رہی ہے۔
مشعال ملک نے اسرائیلی افواج کی طرف سے استعمال کیے جانے والے روایتی، کیمیائی اور فاسفورس بموں کی وجہ سے ہونے والی تباہی کی کم رپورٹنگ ہونے کی مذمت کی۔انہوں نے فلسطین اور مقبوضہ جموں و کشمیر میں ہونے والے مظالم کے بارے میں ہونے والی عالمی بحث اور دنیا کی کشمیری اور فلسطینی عوام کے خلاف تشدد کی وسیع پیمانے پر مذمت پر اطمینان کا اظہار کیا۔
انہوں نے عالمی برادری سے اپیل کی کہ وہ کشمیری اور فلسطینی عوام کے خون کی مساوی قدر کو تسلیم کریں اور ان کی حالت زار پر فوری توجہ دیں۔ اپنے شوہر اور کشمیری حریت رہنما محمد یاسین ملک کے بارے میں بات کرتے ہوئے مشعال ملک نے افسوس کا اظہار کیا کہ یاسین ملک، جسے عالمی سطح پر اپنے عدم تشدد پر مبنی آزادی کی تحریک چلانے پر کشمیر کے گاندھی کے طور پر جانا جاتا ہے، بھارتی جیلوں میں بدترین تشدد کا شکار ہیں۔ انہوں نے بتایا کہ ایک ممتاز کشمیری رہنما سید علی شاہ گیلانی کا انتقال ایک سب جیل میں ہوا۔ بھارت نے سید علی شاہ گیلانی کی آخری آرام گاہ کو بھی سب جیل بنایا ہوا ہے، کیونکہ کسی کو بھی ان کی مزار پر فاتحہ خوانی کے لئے جانے کی اجازت نہیں ہے۔
مشعال ملک نے اس بات پر زور دیا کہ مقبوضہ جموں و کشمیر میں معلومات اور مواصلات کی ناکہ بندی کی آڑ میں بھارت جموں وکشمیر کے آبادیاتی منظر نامے کو تبدیل کر رہا ہے۔ انہوں نے کہا کہ ان اقدامات کے تحت بھارت مقبوضہ جموں و کشمیر کے لوگوں کے حق خود ارادیت کی راہ میں روڑے اٹکا رہا ہے۔انہوں نے انسانی حقوق کی وزارت کی طرف سے شروع کیے گئے 100 روزہ پلان کے اندر جاری اقدامات کے بارے میں بھی آگاہ کیا۔ انہوں نے اس بات پر روشنی ڈالی کہ معاشرے کے تمام طبقات کی رائے کو اس جامع منصوبہ میں شامل کیا گیا ہے۔
فوکل پرسن ٹو ایس اے پی ایم سبین حسین ملک ،انٹرنیشنل ہیومن رائٹس آبزرور(آئی ایچ آر او) کے چیئرمین ڈاکٹر خالد آفتاب سلہری ، سفیر ڈاکٹر ندیم حسین ملک، احمد رضا قصوری ایڈووکیٹ، ایگزیکٹیو ڈائریکٹر و سابق انسانی حقوق کمشنر محمد شفیق ، ممبر نیشنل ہیومن رائٹس کمیشن منظور مسیح ، تھنک ٹینک کے ماہر ایس ڈی جیز سید نصیر گیلانی ، سیکرٹری جنرل سی ڈی اے لیبر یونین عزت کمال پاشا اور پروفیسر مقصود جعفری نے بھی تقریب میں شرکت کی۔
مشعال حسین ملک اور سبین حسین ملک نے تقریب کے منتظمین اور شرکا کو انکے انسانی حقوق سے متعلق خدمات کے اعتراف میں ایوارڈز اور اسناد بھی تقسیم کیں۔
