اسلام آباد،25 جنوری(اے پی پی ):نگران وفاقی وزیر داخلہ ڈاکٹر گوہر اعجاز اور نگران وفاقی وزیر اطلاعات، نشریات و پارلیمانی امور مرتضیٰ سولنگی کے درمیان جمعرات کو یہاں ملاقات ہوئی جس میں وفاقی وزیر اطلاعات نے ڈاکٹر گوہر اعجاز کو وزارت داخلہ کا قلمدان سنبھالنے پر مبارکباد دی۔
ملاقات میں دونوں رہنماﺅں نے 8 فروری کے عام انتخابات کی تیاریوں کا جائزہ اور سیکورٹی انتظامات کو مضبوط بنانے کے لئے اقدامات پر غور کیا۔
اس موقع پر بات کرتے ہوئے وزیر اطلاعات و نشریات مرتضی سولنگی کا کہنا تھا کہ انتخابات کے پرامن اور شفاف طریقے سے انعقاد کے لئے حکومت تمام ممکنہ اقدامات اٹھا رہی ہے،انتخابات کو شفاف اور منصفانہ بنانے میں میڈیا کا اہم کردار ہے۔ میڈیا انتخابی ضابطہ اخلاق پر عمل درآمد کرے،تاکہ انتخابات میں کسی قسم کی اشتعال انگیزی اور پروپیگنڈے سے گریز کیا جائے۔
وفاقی وزیر داخلہ گوہر اعجاز نے کہا کہ سیکورٹی انتظامات کو مضبوط بنانے کے لئے وفاقی و صوبائی حکومتوں کے درمیان مکمل تعاون ہے،تمام سیاسی جماعتیں انتخابات میں امن و امان کو برقرار رکھنے میں حکومت کا ساتھ دیں، تاکہ انتخابات کے دوران امن و امان ہر صورت برقرار رکھا جائے گا۔
ملاقات میں انتخابات کے دوران میڈیا کی ذمہ داریوں سے متعلق بھی تبادلہ خیال ہوا۔
