گلگت ،08مارچ (اے پی پی): وزیر اعلیٰ گلگت بلتستان حاجی گلبر خان نے کہا ہے کہ 8 مارچ کو عالمی یوم خواتین کے طور پر منایا جاتا ہے بلکہ اس دن کو خواتین کے حقوق کی تحریک میں ایک مرکزی نقطہ کے طور پر منایا جاتا ہے، جو صنفی مساوات، تولیدی حقوق اور خواتین کے خلاف تشدد اور بدسلوکی جیسے مسائل پر توجہ دلاتا ہے۔اسلام میں خواتین کو اعلیٰ مقام اور مرتبہ حاصل ہے۔ قرآن پاک کی آیت کا ترجمہ ہے کہ عورتوں کے لیے بھی معروف طریقے پر ویسے ہی حقوق ہیں، جیسے مردوں کے حقوق اُن پر ہیں البتہ مردوں کو اُن پر ایک درجہ حاصل ہے ۔
عالمی یوم خواتین کے حوالے سے منعقدہ تقریب سے خطاب کرتے ہوئے وزیر اعلیٰ گلگت بلتستان حاجی گلبر خان نے کہا کہ عورت معاشرے کا اہم کردار ہے جس کے بغیر گھر ویران ہے اور معاشرہ سنسان ہے، بطور مسلمان جب ہم قرآن و حدیث اور حضرت محمدﷺ کی زندگی کا مطالعہ کرتے ہیں تو ہمیں معلوم ہوتا ہے کہ عورت کے بھی طے شدہ حقوق ہیں، اسلامی اقدار اور علاقائی روایت میں رہتے ہوئے تعلیم کا حصول ایک عورت کیلئے بھی اتنا ہی ضروری ہے جتنا ہمیں ہے۔
وزیر اعلیٰ گلگت بلتستان حاجی گلبر خان نے کہا کہ حکومت گلگت بلتستان عورتوں کے اس عالمی دن کو مناتے ہوئے اس عزم کا اظہار کرتی ہے کہ ہماری حکومت خواتین کے حقوق کے تحفظ اور انہیں بااختیار بنانے کیلئے کوشاں ہے، خواتین کے مسائل کو کم کرنے سمیت انکو زندگی کی دوڑ میں یکساں مواقعوں کی فراہمی ہماری حکومت کا اولین ایجنڈا ہے، آج کا دن ان خواتین کو بھی یاد کرنے کا موقع فراہم کرتا ہے جنہوں نے امت مسلمہ کی تشکیل اور اس کی ترقی میں اہم کردار ادا کیا۔عورت کی رائے کا احترام اور انکو معاشرے کا باوقار شہری بنانے کیلئے موجودہ حکومت پرعزم ہے اس سلسلے میں حکومت گلگت بلتستان نے کم وقت میں خواتین دوست پالیسیوں کے ذریعے گلگت بلتستان میں خواتین کو بااختیار بنانے کیلئے بہت سارے منصوبوں پر کام کا آغاز کر چکی ہے ۔
اس موقع پر وزیر اعلیٰ نے“گلگت بلتستان وومن امپاورمنٹ پالیسی سٹرٹیجی اینڈ ایکشن پلان 2024-29 ” کا افتتاح کیا۔
