لاہور5مارچ:( اے پی پی ) رمضان المبارک کے موقع پر پنجاب کے عوام کے لئے بڑے تحفے کی تقسیم کا آغازکر دیا گیا ہے۔ رمضان نگہبان ریلیف پیکیج کے تحت عوام کا حق عوام کی دہلیز پر پہنچانے کا عمل شروع ہوگیا ہے۔ وزیراعلی پنجاب مریم نوازشریف کی زیرصدارت رمضان پیکیج کی شفاف تقسیم اور مانیٹرنگ کا جائزہ لینے کے لئے خصوصی اجلاس منعقد ہوا۔ اجلاس کوبریفنگ میں بتایا گیا کہ رمضان پیکیج کی شفاف انداز میں مستحقین کو فراہمی کے نظام کو فول پروف بنایا گیا ہے۔لائیوڈیش بورڈ اور جدید ٹیکنالوجی کی مدد سے پیکیج کی تقسیم کی نگرانی کی جا رہی ہے۔ہیلپ لائن کے ذریعے عوام شکایات سے آگاہ کرسکیں گے۔ پنجاب کی تاریخ کے سب سے بڑے رمضان ریلیف پیکیج کی تقسیم پر وزیراعلیٰ مریم نواز شریف کو حکام نے بریفنگ دیتے ہوئے بتایا کہ ہیلپ لائن قائم کردی گئی،جس کا باضابطہ آغازجلد ہو گا۔ وزیراعلی مریم نوازشریف نے اجلاس میں رمضان پیکیج کی اشیاء کا اعلی معیار یقینی بنانے پر زور دیا اور کہا کہ آٹا، گھی، چینی سمیت دیگر اشیائے خوردونوش کے معیار پر شکایت برداشت نہیں کروں گی۔رمضان نگہبان ریلیف پیکیج کی تقسیم کے لئے نادرا اور بے نظیر انکم سپورٹ پروگرام کے ڈیٹا کو استعمال کیاجارہا ہے۔ رمضان ریلیف پیکیج کی تقسیم کا باضابطہ آغاز 2ر مضان سے ہوگا، 10 رمضان تک تقسیم مکمل کرنے کا ہدف ہے۔ تاریخ میں پہلی باررمضان پیکیج گھر وں تک پہنچایا جا رہا ہے۔
