سکھر،31مارچ(اے پی پی): رحمتوں، برکتوں، فضیلتوں بھرے ماہ صیام کا دوسرا عشرہ مکمل ہونے پر 20رمضان المبارک کی شام لاکھوں فرزندان اسلام ملک بھر کی اہم جامع مساجد میں اعتکاف بیٹھ گئے جو چاند رات تک مساجد میں قیام اور خشوع و خضو ع کے ساتھ اپنی مذہبی عبادات سرا نجام دیں گے،مساجد میں اعتکاف بیٹھنے والوں کیلئے خصوصی انتظامات کئے گئے ہیں تاکہ وہ یکسوئی سے اپنی عبادات کا سلسلہ جاری رکھ سکیں۔
فرزندان توحید کی طرح ہزاروں دختران اسلام بھی اپنے گھروں میں اعتکاف بیٹھ گئیں جبکہ بعض اداروں کی جانب سے بھی دینی مدارس میں خواتین کے اجتماعی اعتکاف کابھی اہتمام کیا گیاہے۔ ممتاز عالم دین اور خطیب جامعہ مسجد نے بتایا کہ رمضان کے آخری عشرہ میں اعتکاف بیٹھنا رسول کریم ﷺکی سنت موکدہ ہے۔ انہوں نے کہا کہ آپ ﷺنے صرف ایک سال جب آپﷺ جہاد میں مصرف تھے کے سوا ہمیشہ رمضان کا آخری عشرہ اعتکاف میں گزارا۔
انہوں نے کہا کہ مسجد یا گھر میں 10روز کیلئے اعتکاف بیٹھنا مسنون ہے لیکن ایسا ممکن نہ ہوتو کچھ دیرکیلئے بھی اعتکاف بیٹھا جا سکتا ہے۔انہوں نے کہا کہ اعتکاف مرد کا ہو یا عورت کا اس میں روزہ شرط ہے جبکہ اگر اعتکاف اجتماعی ہو تو اس کے ثمرات کئی گنا بڑھ جاتے ہیں۔انہوں نے بتایاکہ مردوں کی طرح خواتین دختران اسلام بھی اعتکاف کے ایام ذکر وفکر، نفل وعبادت، مطالعہ و تلاوت، تعلیم وتعلم، خیر وبھلائی کیلئے اذکار میں گزاریں گی۔
اس موقع پر اعتکاف بیٹھنے والوں کیلےسکیورٹی کے فول پروف انتظامات کئے گئے ہیں۔
