لاہور،16اپریل ( اے پی پی ): وزیر اعلیٰ پنجاب مریم نواز شریف اچانک مری کے تحصیل ہیڈ کوارٹر ہسپتال پہنچ گئیں ۔ مریم نواز شریف نے او پی ڈی میں مریضوں کی لمبی لائنیں دیکھ کر اظہار برہمی کیامریضوں کو انتظار کروانے پر ایم ایس کی سرزنش کی۔وزیر اعلیٰ مریم نواز شریف نے ہسپتال کے مختلف شعبے اور وارڈز دیکھے او پی ڈی کا معائنہ کیااور مریضوں سے بات چیت کی۔
وزیر اعلیٰ نے قطار میں کھڑی خواتین سے بات چیت کی اور مسائل کے بارے میں دریافت کیا مریض ماں بیٹی کو دلاسہ دیا اور کہا کہ گھبرائیں مت!انشاء ٹھیک ہو جائے گی، وزیر اعلیٰ مریم نواز شریف نے ننھے بچے سے اظہار شفقت کیا اور ڈاکٹر کو بہترین علاج کی ہدایت کی۔
ایمرجنسی وارڈ میں داخل مریضوں کی باری باری عیادت کی اور صحت یابی کی دعائیں دی۔وزیر اعلیٰ مریم نواز شریف نے ایمرجنسی میں مریضوں کی بہتر دیکھ بھال کی ہدایت بھی کی ۔وزیر اعلیٰ مریم نواز شریف نے ہسپتال میں طبی ٹیسٹوں کے سہولیات کے بارے میں پوچھاپی سی یو سنٹرکا بھی جائزہ لیا۔وزیر اعلیٰ مریم نواز شریف نے میڈیکل وارڈ، گائنی اور نرسری میں موجود سہولیات کا بھی جائزہ لیا۔وزیر اعلیٰ مریم نواز شریف نے ہسپتال سے واپسی پر خواتین سیکورٹی گارڈ کے کہنے پر تصویر بنوائی اور اسے گلے لگالیا۔
