مکہ مکرمہ، 30 مئی(اے پی پی):سعودی عرب میں پاکستانی عازمینِ حج کی آمد کا سلسلہ جاری ہے ۔ اس سال پاکستان حج مشن 70 ہزار 105 سرکاری عازمین حج اور 80 ہزار سے زائد پرائیویٹ عازمین کی میزبانی کرے گا۔
اب تک 170 پروازوں سے 41 ہزار 477سرکاری جبکہ نجی حج سکیم کے ذریعے ساڑھے 10 ہزار سے زائد عازمینِ حج سعودی عرب پہنچ چکے ہیں ۔ اگلے دس دنوں میں مزید 28 ہزار 628 سرکاری عازمینِ حج مکہ مکرمہ پہنچیں گے جبکہ یکم جون تک براہ راست مدینہ منورہ آنے والے تمام عازمینِ کرام مکہ مکرمہ پہنچ جائیں گے ۔
سعودی حکام کے خصوصی تعاون سے مدینہ منورہ میں 30 ہزار 9 سو عازمینِ حج کو زیارتِ ریاض الجنہ کروا دی گئی ہے۔
پاکستان حج مشن کے تحت موبائل ایپ پاک حج ، دو ٹال فری ہیلپ لائنز اور 4 واٹس ایپ نمبرز کے ذریعے عازمینِ حج کی شکایات کا ازالہ کیا جا رہا ہے اس کے علاوہ حرمین میں 2 مرکزی ہسپتال اور درجن بھر ڈسپنسریوں کے ذریعے 282 ڈاکٹرز اور طبی عملہ طبی سہولیات فراہم کر رہا ہے۔
پاکستان حج مشن کے مرکزی ہسپتالوں میں جدید ایمبولینس، لیبارٹری، ایکسرے،الٹراساونڈ، ای سی جی، مائنر او ٹی، زنانہ و مردانہ وارڈ ، شعبہ دندان موجود ہیں جبکہ عازمینِ حج کی سفری اور رہائشی سہولیات نیز خوراک کی فراہمی کیلئے پاکستانی سول اور یونیفارم افسران و عملہ پر مشتمل 390 معاونین کام کر رہے ہیں۔
مذہبی امور کے 131 افسران و معاون عملہ مین کنٹرول آفس، مدینہ اور جدہ ایئرپورٹس ، شعبہ گمشدگی و بازیابی، مدینہ ڈیپارچر سیل، مانیٹرنگ سیل، اکاؤنٹس و انتظامیہ کے معاملات دیکھ رہے ہیں جن کے ذریعے اب تک مکہ و مدینہ میں گزشتہ 20 دنوں میں 115 عازمین کرام کو تلاش کر کے ان کی رہائش گاہوں تک پہنچایا گیا اور 683 بیگز ، پرس اور 160 وہیل چیئرز تلاش کر کے مالکان تک پہنچائی گئیں۔
گزشتہ 20 دنوں میں خوراک کی 454، رہائش کی 1123 جبکہ ٹرانسپورٹ کی 264 شکایات کا ازالہ کیا گیا جبکہ حرم مکی میں داخلی راستوں پر تعینات حرم گائیڈز نے اب تک 17 ہزار 924 عازمینِ حج کو رہنمائی فراہم کی۔
