سیالکوٹ، 04 مئی (اے پی پی):فائر فائٹرز کے عالمی دن کے موقع پر سیالکوٹ ریسکیو1122 کی جانب سے فارورڈ اسپورٹس ساہووالہ میں ہنگامی صورت حال سے نمٹنے کی فرضی مشق کی گئی۔
اس موقع پر بطور مہمان خصوصی خطاب کرتے ہوئے ریجنل ایمرجنسی آفیسر گوجرانوالہ سید کمال عابد نے کہا کہ فائر فائٹرز ہمارے قومی ہیرو ہیں جو اپنی زندگیوں کو خطرے میں ڈال کے عوام الناس کی جان و مال کی حفاظت کو یقینی بناتے ہیں۔ انہوں نے ریسکیو کی کارکردگی کو سراہا اور ان کی پیشہ وارانہ صلاحیتوں پر اطمینان کا اظہار کیا ۔
چیف ایگزیکٹو آفیسر (سی ای او) فارورڈ سپورٹس خواجہ مسعود نے بھی اس موقع پر اظہار خیال کیا۔اس فرضی مشق کا انعقاد بانی ڈائریکٹر جنرل ڈاکٹر رضوان نصیر کی خصوصی ہدایت پر ریجنل ایمرجنسی آفیسر سید کمال عابد کی زیر نگرانی، ڈسٹرکٹ ایمرجنسی آفیسر انجینئر نوید اقبال کی سربراہی میں فائر فائٹرز کے عالمی دن کی مناسبت سے کسی بھی ہنگامی صورت حال سے بروقت نمٹنے، انسیڈنٹ کمانڈ اینڈ کنٹرول سسٹم کو جانچنے اور ریسکیو کی آپریشنل صلاحیتوں کا جائزہ لینے کے لیے فارورڈ اسپورٹس ساہووالہ میں کیا گیا تھا جس میں ریسکیورز، ریسکیو محافظین اور فارورڈ اسپورٹس کی ٹیم نے حصہ لیا۔
فرضی مشقوں میں کسی سانحہ کی صورت میں انسیڈنٹ کمانڈ پوسٹ اور کنٹرول ٹاور قائم کرنا، چھتوں پر پناہ لینے والوں کو باحفاظت نیچے اتارنا، زخمیوں کو بروقت ابتدائی طبی امداد مہیا کرکے ہسپتال منتقل کرنا، ریسکیو وہیکل کے آلات کا استعمال کر کے بلڈنگ میں پھنسے لوگوں کو نکالنا، کیمیکل فائر کی صورت میں لوگوں کو بروقت باہر نکال کر طبی امداد مہیا کرنا، آگ لگنے کی صورت میں بروقت آگ پر قابو پا کر اسے پھیلنے سے روکنا شامل تھا۔
اس فرضی مشق کے دوران ڈسٹرکٹ ایمرجنسی آفیسر انجینئر نوید اقبال نے بطور انسیڈنٹ کمانڈر اور ریسکیو سیفٹی آفیسر محمد احسان نے آپریشنل کمانڈر کے فرائض سر انجام دیے۔ ریجنل ایمرجنسی آفیسر گوجرانوالہ سید کمال عابد، سی ای او فارورڈ اسپورٹس خواجہ مسعود اختر اور سیالکوٹ چیمبر آف کامرس اینڈ انڈسٹری کے انڈسٹریل سیفٹی اور رسک مینجمنٹ کے چئیرمین محمد شہباز صائم نے فرضی مشق کا معائنہ کیا۔
چیمبر آف کامرس سیالکوٹ کے انڈسٹریل سیفٹی اور رسک مینجمنٹ کے چئیرمین شہباز صائم نے فرضی مشق کے انعقاد پر ریسکیو 1122 کو داد دی اور کہا کہ انڈسٹریز و بلڈنگ کو حادثات سے محفوظ بنانے کے لیے سیالکوٹ چیمبر ہر طرح سے ریسکیو کو تعاون فراہم کرے گا۔ بعد ازاں دوران ریسکیو آپریشن شہید ہونے والے فائر فائٹرز کے لیے دعا مغفرت بھی کروائی گئی۔
