لاہور،14مئی ( اے پی پی ): صوبائی وزیر زراعت سید عاشق حسین کرمانی سے سنجنٹاپاکستان پرائیویٹ لمیٹیڈ کمپنی کے کنٹری ہیڈ ذیشان حسیب بیگ نے منگل کو یہاں زراعت ہاؤس میں ملاقات کی۔سیکرٹری زراعت پنجاب افتخار علی سہو، مینجر بزنس کمیونیکشن افضان منیر اور ہیڈ ار این ڈی توصیف الحق بھی ملاقات میں شریک تھے ۔
وزیر زراعت پنجاب سید عاشق حسین کرمانی کو سنجنٹا کمپنی کے کنٹری ہیڈ ذیشان حسیب بیگ نے بریفنگ دی اور بتایا کہ کمپنی کاشتکاروں کو زرعی مداخل، ٹیکنیکل فیلڈ رہنمائی اور ڈیجیٹل سروسز کے علاوہ فصلوں کی پیداوار بڑھانے والی پروڈکٹس فراہم کرتی ہے۔
اس موقع پر گفتگو کرتے ہوئےصوبائی وزیر زراعت سید عاشق حسین کرمانی نے کہا کہ صوبہ پنجاب میں فصلوں کی فی ایکڑ پیداوار میں اضافہ کے لیے محکمہ زراعت پنجاب اور پرائیویٹ سیکٹر کا باہمی اشتراک و تعاون از حد ضروری ہے۔ کاشتکاروں کو فصلوں کی جدید پیداواری ٹیکنالوجی سے متعلق آگاہی اور موبلاائزیشن کے لیے مشترکہ پروگرامز کا انعقاد وقت کا اہم تقاضا ہے ۔ انہوں نے کہا کہ کپاس کی کاشت کے سلسلے میں مشترکہ پروگرامز کے انعقاد کے ذریعے کاشتکاروں کی راہنمائی کی جائے۔کاشتکاروں کو معیاری زرعی مداخل کی فراہمی کے لیے کمپنی کی سروسز قابل تعریف ہیں۔
انہوں نے کہا کہ محکمہ زراعت پنجاب کاشتکاروں سے روابط میں بہتری کے لیے زرعی گریجویٹس کی کنٹریکٹ پر بھرتی کر رہا ہے۔ زرعی گریجویٹس کے ساتھ ڈیلرز اور فرنچائز کو منسلک کر کے کسانوں کے ساتھ مشاورتی سیشنز کا اہتمام کیا جائے۔ انہوں نے کہا کہ نواز شریف کسان کارڈ کے اجرا کے سلسلے میں کمپنی کے تمام ڈیلرز اور فرنچائز کی آؤٹ لیٹس پر سہولیات فراہم کی جائیں۔ کاشتکاروں کو فصلوں کی فی ایکڑ پیداوار میں اضافہ کے لیے ہر ممکن اقدام اٹھایا جائے گا۔ جنوبی پنجاب میں کپاس کے کاشتکاروں کیلئے پروگرامز تشکیل دئیے جائیں۔ انہوں نے کہا کہ محکمہ زراعت پنجاب اور کمپنی کے مشترکہ پروگراموں سے کاشتکاروں کی پیداواری لاگت میں کمی واقع ہو رہی ہے۔ کاشتکاروں کی آگاہی کیلئے ڈیجیٹل ٹیکنالوجی کا استعمال ضروری ہے۔
